Sochi futbol klubi yarim himoyachisi Martin Kramarich jamoa bosh murabbiyi Robert Moreno tomonidan ilgari surilgan oylik maoshning yarmini klub foydasiga qaytarish taklifiga munosabat bildirdi. Bu haqida Euro-football.ru xabar berdi.
Ushbu taklif Sochi jamoasi Tol’yatti shahrining Akron klubi bilan o‘yinda yirik hisobda mag‘lub bo‘lgach, ya’ni 0:4 hisobida yutqazgach bildirildi. Murabbiy Moreno bu mag‘lubiyatdan so‘ng o‘zini bu darajadagi maoshga loyiq emasligini ta’kidladi va shu sababli futbolchilarga ham o‘z namunasiga ergashishni tavsiya qildi.
Kramarichning ta’kidlashicha, hozircha Sochi futbolchilari oylik maoshining yarmini klubga topshirmagan. Biroq, bu masala jamoa rahbariyati bilan muhokama qilinishi rejalashtirilgan.
U, shuningdek, jamoa ichidagi muhit va bosh murabbiy bilan o‘zaro munosabatlar yaxshi ekanini aytib o‘tdi. Hozirda Sochi jamoasi mamlakat chempionatining turnir jadvalida so‘nggi o‘rinda bormoqda.
Klub ikki uchrashuvda ham ochko to‘plaganicha yo‘q. Kecha esa Sochi jamoasi Rossiya Kubogi guruh bosqichida Moskvaning Dinamo klubiga yutqazib, mavsumdagi uchinchi mag‘lubiyatini qabul qilib oldi.
