Ektor Fort Barselonani Mayorka uchrashuvidan so‘ng tark etadi

Barselona futbol jamoasining o‘ng qanot himoyachisi Ektor Fort tez orada klubni tark etishi kutilmoqda. Bu haqida Euro-football.ru xabar berdi.

19 yoshli futbolchi 16 avgust kuni bo‘lib o‘tadigan La Liga birinchi turida Barselona va Mayorka o‘rtasidagi uchrashuv uchun asosiy tarkibga kiritiladi. Uchrashuvdan so‘ng esa Ektor Fort boshqa jamoaga ijaraga beriladi.

Hozirda futbolchiga bir nechta klubdan takliflar bor va u yaqin kunlarda ulardan birini tanlashi rejalashtirilgan. Avvalroq Barselona rahbariyati Ektor Fortga ijaraga ketishni tavsiya qilgani haqida xabarlar tarqalgan edi.

Sababi, u asosiy tarkibda o‘ynash uchun Jül Kunde va Erik Garsiya bilan raqobatlashishda qiyinchiliklarga duch kelmoqda. Yosh ispaniyalik futbolchi Barselonaning asosiy jamoasi safida jami 30 ta o‘yin o‘tkazgan va uchta golli uzatmaga mualliflik qilgan.

Ektor Fortning kelajagi yaqin kunlarda aniqlik kasb etishi kutilmoqda. Klub uning tajriba orttirishi uchun yangi jamoada muntazam o‘yin amaliyotiga ega bo‘lishini maqsad qilgan.