«Galatasaray» jamoasi hujumchisi Mauro Ikardi maydonga qaytgach, darhol gol urdi. Bu haqida Euro-football.ru xabar berdi.
U noyabr oyidan beri, ya’ni 282 kun davomida tizzasidagi kesilgan bog‘lam sabab maydonga tusha olmagan edi. Turkiya chempionatining ikkinchi turida, juma kuni o‘tkazilgan «Fatih Karagümrük»ga qarshi o‘yinda Ikardi 81-daqiqada maydonga tushdi va 87-daqiqada darvoza to‘pini aniq yo‘llab, yakuniy hisobni 3:0 ga olib keldi.
Mauro Ikardi «Galatasaray» safida to‘rtinchi mavsumini o‘tkazmoqda. 2023-yil yozida Istanbul klubi uni «PSJ»dan 10 million yevroga sotib olgan.
Jamoa yangi mavsumda Superligada ikki o‘yinda ikkita g‘alabani qo‘lga kiritib, chempionlikni himoya qilishni boshladi.
