Gvardiola Husanovning kamchiligi va yutuqlari haqida nimalar dedi?

Angliya Premer-ligasining 25-turidan oʻrin olgan bahs oʻz nihoyasiga etdi. Mazkur turda Xosep Gvardiola boshchiligidagi "Manchester Siti" "Nyukasl Yunayted" ustidan yirik 4:0 hisobida zafar quchdi.

Ushbu bellashuvda misrlik yulduz hisoblangan Umar Marmush xet-trikka erishdi (19, 24, 33). Oʻyinning 84-daqiqasida Makati hisobni yanada yiriklashtirib qoʻydi.

Milliy terma jamoamiz a'zosi hisoblangan Abduqodir Husanov esa oʻyinni toʻliq oʻtkazdi. Bellashuvdan soʻng "shaharliklar" ustozi Xosep Gvardiola matbuot anjumanida hamyurtimiz haqida oʻz fikrlari bilan oʻrtoqlashdi:

- Abduqodir Husanov yakkama-yakka vaziyatlarda juda agressiv. Biroq koʻrinib turibdiki, bu uning qoʻpolligi. Boshqa tajribali markaziy himoyachilarda esa bu qoidabuzarlik boʻlmasdi. Oʻylashimcha, u oʻrganadi.

- Jamoaga kelishidan bir necha kun oʻtib "Chelsi"ga qarshi oʻynash oson emas. Ilk daqiqalarda nimalar boʻlganini koʻrdingiz. Oʻzbekiston yoki Fransiyadan bu erga kelish oson emas. U bugun Ruben Diash, Manuel Akanji va Natan Ake va boshqalarning vaziyatidan kelib chiqib oʻynadi va bu Husanov uchun, biz uchun va biz tasavvur qilgan potentsialni shakllantirish uchun juda yaxshi.

- U toʻp bilan ancha xotirjam va juda tez. Agar Isakka qarshi oʻynab, zudlik bilan orqaga qaytish kerak boʻlsa, u buni uddalay oladi. Shuningdek, qaror qabul qilish ham yaxshilanishi kerak, ammo bu yosh masalasi.

- Eng muhimi, Abduqodir jamoaga juda yaxshi moslashdi. U juda uyatchan va koʻp gapirmaydi. Oʻylaymanki, u bizga hali koʻp yordam beradi. U jamoadagilar bilan juda yaxshi munosabatda boʻldi. Abduqodir Husanov, Niko Gonsales va Vitor Reys kabi yosh futbolchilar bilan "Siti" keyingi yillarda rivojlanadi.

20 yoshli himoyachimiz ushbu oʻyin davomida 76 marta toʻpga teginishga muvaffaq boʻlib, 68 ta uzatma berdi. Ularning 63 tasi jamoadoshlariga aniq etib bordi (93 %). Bundan tashqari, iqtidorli himoyachi oʻyin davomida 7 bora uzoq masofaga uzatma amalga oshirib, 2 tasi aniq etib bordi.

Abduqodir maydondagi 3 ta kurashlardan bittasida gʻalaba qozonishga ham muvaffaq boʻldi. Shuningdek, ikkinchi qavatdagi kurashlarda 100 foizlik (2/2) koʻrsatkich qayd etdi. Husanov oʻyin davomida 2 bora qoida buzishga ham ulgurdi. Uning ushbu harakatlarini "Sofascore" portali 7.0 ballga loyiq koʻrdi.

Ma'lumot oʻrnida, Gvardiola boshchiligidagi "shaharliklar" navbatdagi uchrashuvini 19 fevral kuni Ispaniyaning "Real Madrid" klubiga qarshi oʻtkazadi.