“Barselona”dan uchralgan alamli mag‘lubiyat “Real”da katta o‘zgarishlarga sabab bo‘lmoqda
Ispaniya La Ligasining 35-turida «Real Madrid» «Kamp Nou» stadionida o‘zining ashaddiy raqibi «Barselona»ga qarshi o‘ynab, dramatik bahsda 3:4 hisobida mag‘lub bo‘ldi va chempionlik umidlarini deyarli barbod qildi. Mazkur yirik mag‘lubiyatdan so‘ng «qirollik klubi» rahbariyati jamoa tarkibida jiddiy o‘zgarishlar qilishga qaror qildi. Fichajes nashrining yozishicha, klub ayrim yulduz futbolchilar bilan xayrlashishga tayyorlanmoqda.
Transferlardan tushgan mablag‘ esa yangi iste’dodli futbolchilarni sotib olish uchun sarflanishi kutilmoqda. Quyidagi futbolchilar transfer bozoriga chiqariladigan asosiy nomzodlar sifatida ko‘rilmoqda:
Orelen Tchuameni – jamoa bosh murabbiyi Karlo Anchelotti va muxlislarning katta ishonchini qozona olmagan Fransiya terma jamoasi yarim himoyachisi mavsum davomida turli tanqidlarga duch kelgan edi. «Barselona» bilan bo‘lgan hal qiluvchi o‘yindagi sust harakatlari tufayli unga bo‘lgan bosim yanada ortib ketdi. «Real» mutasaddilari 90 million yevro va undan yuqori takliflar bo‘lsa, futbolchini sotib yuborishga tayyor ekanliklarini ma’lum qildi.
Fran Garsiya – mavsum boshida jamoaning asosiy himoyachisi sifatida katta umidlar bilan tarkibga jalb qilingan ispaniyalik chap qanot himoyachisi Fran Garsiyaning o‘yini ham bu mavsumda barqaror emas edi. «Barselona»ga qarshi o‘tkazilgan bahsda u raqibning yosh yulduzi, 17 yoshli Lamin Yamalning harakatlariga qarshi yetarlicha kurasha olmadi. Hozirda Garsiyaga Angliyaning «Bornmut» klubi jiddiy qiziqish bildirmoqda. Madridliklar esa uni taxminan 15-20 million yevro atrofidagi transfer summasiga sotishni rejalashtirgan.
Dani Sebalos – bir paytlar Yevropaning eng istiqbolli yarim himoyachilaridan biri sifatida baholangan Dani Sebalos ham «Real»dagi imkoniyatlardan foydalana olmadi. Ayniqsa, «Barselona»ga qarshi bo‘lgan hal qiluvchi bahsda uning markaziy zonadagi sust va samarasiz harakatlari jamoaning mag‘lubiyatiga sababchi bo‘lgan omillardan biri sifatida ko‘rildi. Madrid klubi bir necha yil avval 45 million yevroga baholangan bu futbolchini endi to‘rt barobar arzonroq narxga sotib yuborishga tayyor.
Ekspertlarning fikricha, «Real Madrid»ning ushbu qarorlari yozgi transfer bozorida katta o‘zgarishlarga sabab bo‘ladi va jamoa tarkibi yangi qon bilan boyitiladi. Shu bilan birga, madridlik muxlislar klubning yangi transferlari va qanday futbolchilar bilan shartnoma imzolashini sabrsizlik bilan kutmoqda.
Zamin.uz tahririyati transfer bozoridagi yangiliklarni diqqat bilan kuzatib, so‘nggi ma’lumotlarni o‘z o‘quvchilariga tezkor yetkazishda davom etadi. Biz bilan qoling!
