Ispaniya chempionati doirasida o‘tkazilgan «El Klasiko» bahsi «Real Madrid» uchun nafaqat hisob jihatidan, balki tarkib jihatidan ham og‘ir yo‘qotishlarga sabab bo‘ldi. Katta shiddat bilan kechgan o‘yinda madridliklarning yetakchi futbolchilari – Vinisius Junior va Lukas Vaskes jiddiy jarohat olishdi va bu mavsum maydonga qayta tushmasligi maʼlum bo‘ldi. Bu haqda AS nashri xabar tarqatdi.
Xabarga ko‘ra, braziliyalik yulduz hujumchi Vinisius Junior raqib himoyachilari bilan keskin kurash chog‘ida chap oyog‘ining to‘pig‘idan og‘ir jarohat olgan. Tibbiy ko‘rik natijalari futbolchining mavsumning qolgan qismida maydonga tushishi mumkin emasligini ko‘rsatgan.
Shuningdek, o‘yinning ikkinchi yarmida zaxiradan maydonga tushgan tajribali yarim himoyachi Lukas Vaskes ham noxush jarayonda ishtirok etib, oyog‘idagi mushaklarini shikastlab olgan. Dastlabki tashxisga ko‘ra, uning jarohati jiddiy bo‘lib chiqdi va tiklanish jarayoni bir necha haftani talab etadi. Bu esa futbolchining mavsum oxirigacha o‘yinlarga qayta olmasligini anglatadi.
Ushbu ikki muhim futbolchining yo‘qligi jamoaning kelgusi uchrashuvlardagi natijalariga salbiy taʼsir qilishi mumkinligi aytilmoqda. Karlo Anchelotti boshchiligidagi “Real” ayni damda turnir jadvalida ikkinchi o‘rinda bormoqda va jamoa tarkibidagi bunday yo‘qotishlar murabbiy uchun katta muammolarni keltirib chiqarishi mumkin.
Shuningdek, aytib o‘tish joizki, Vinisius Junior bu mavsum «Real Madrid»ning eng samarali futbolchilaridan biri sifatida o‘zini namoyish qilib, jamoaning asosiy hujum qurollaridan biri hisoblanadi. Uning yo‘qligida jamoaning hujum chizig‘i jiddiy zaiflashishi tabiiy.
Lukas Vaskes esa madridliklarning tajribali o‘yinchisi sifatida turli pozitsiyalarda samarali harakat qilib keladi va murabbiyga taktik moslashuvchanlik borasida ko‘mak berib turadi. Endi uning o‘rnini ham yopish uchun murabbiylar shtabiga qiyinchilik tug‘iladi.
Zamin.uz tahririyati jarohat olgan futbolchilarga tezroq tiklanib olishni tilab qoladi!
