Indzagi "Real"ga qarshi o‘yin oldidan o‘z fikrlarini bildirib o‘tdi
Klublar o‘rtasidagi Jahon chempionati doirasidagi muhim to‘qnashuvlardan biri — "Real Madrid" va "Al-Hilol" jamoalari o‘rtasidagi bellashuv arafasida "Al-Hilol" bosh murabbiyi Simone Indzagi jurnalistlar bilan o‘rtoqlashdi. Uning fikrlari jamoa ruhiyati va katta uchrashuvga tayyorgarlik darajasini yaqqol namoyon qildi.
— Biz, ehtimol, dunyoning eng kuchli va maqsadga intiluvchan klublaridan biriga qarshi maydonga tushamiz. Ammo bu bizga o‘z o‘yinimizdan voz kechish uchun sabab bo‘la olmaydi, — dedi Indzagi. — Har bir futbolchida ishonch bor, bu ishonch bizga g‘alaba uchun kurashishga kuch bag‘ishlaydi. Biz bu turnirda yuzaga chiqishni, muxlislarga katta shou ulashishni xohlaymiz.
Italiyalik mutaxassisning ta’kidlashicha, jamoa tarkibini mustahkamlashga katta e’tibor qaratilgan, biroq vaqtning kamligi ba’zi rejalarni to‘liq amalga oshirishga xalaqit bergan.
— Transfer oynasi juda qisqa bo‘ldi. Bu biz uchun muammo tug‘dirdi. Biroq shunga qaramay, qo‘limizda bor imkoniyatlarni maksimal darajada ishga solyapmiz. Tarkibimizda katta salohiyatga ega o‘yinchilar bor va biz ular bilan yangi tarix yozishni niyat qilganmiz.
Qayd etish joiz, ushbu bellashuv jahon miqyosidagi futbol muxlislari diqqati markazida. Chunki Ispaniyaning mashhur “Real Madrid”i va Saudiya Arabistonining “Al-Hilol”i o‘rtasidagi bunday yirik uchrashuv har doim kutilmagan natijalar va yuksak shiddat bilan ajralib turadi.
Bellashuv 19 iyunga o‘tar kechasi, Toshkent vaqti bilan soat 00:00 da start oladi. Bu tunda nafaqat maydondagi jang, balki taktik kurashlar ham yuqori darajada bo‘lishi shubhasiz.
Futbol olami endi Simone Indzagining va’dasi qanchalik amalga oshishini kuzatadi. "Al-Hilol" o‘z so‘zini ayta oladimi — buni vaqt ko‘rsatadi.
