Ueyn Runi Angliya oltinchi ligasida murabbiy bo‘lishi mumkin
Avvalgi Angliya terma jamoasi hujumchisi va "Plimut" jamoasining sobiq bosh murabbiyi Ueyn Runi Shimoliy Milliy liga klubida murabbiylik faoliyatini davom ettirish taklifini oldi. Bu haqida Euro-football.ru xabar berdi.
The Sun nashrining ma'lumotlariga ko‘ra, 39 yoshli mutaxassis "Maklsfild" jamoasining bosh murabbiyi lavozimiga nomzod sifatida ko‘rib chiqilmoqda. Jamoaning hozirgi murabbiyi Robert Sevidj yaqinda klubni tark etib, yuqori diviziondagi yangi lavozimga o‘tishi kutilmoqda.
Shu sababli "Maklsfild" rahbariyati Runi nomzodini asosiy variant sifatida ko‘rmoqda. "Plimut"dagi muvaffaqiyatsiz faoliyatidan so‘ng, u 2024 yil dekabrida jamoani Chempionship chempionatining oxirgi o‘rnida qoldirib ketgan edi. Shundan beri Ueyn Runi hech qanday klubda ishlamadi.
Bu davrda u telekommentator va futbol eksperti sifatida faoliyat yuritdi va murabbiylikka qaytishni istashini yashirmadi. Runi o‘zining murabbiylikdagi keyingi qadamini kutmoqda va ushbu yangi imkoniyat unga faoliyatini davom ettirish uchun yaxshi imkoniyat bo‘lishi mumkin.
