Madridning «Atletiko» jamoasi yarim himoyachisi Rodrigo de Paul «Inter Mayami» klubiga o‘tish fikrini ma’qullaydi. Bu haqida Euro-football.ru xabar berdi.
So‘nggi paytlarda ommaviy axborot vositalarida tarqalgan ma’lumotlarga ko‘ra, Lionel Messi o‘z klubining rahbariyatini de Paul bilan shartnoma imzolashga ishontirmoqda. Inter Mayami News Hub manbasining xabar berishicha, «matraschilar» yarim himoyachisi «Inter Mayami» jamoasining qiziqishini biladi va Messiga yaqin bo‘lish uchun bitta klubda o‘ynashni istaydi.
Shu bois u bunday imkoniyatni ijobiy qabul qilmoqda. 31 yoshli futbolchi ko‘chib o‘tishni kechiktirmaslik tarafdori, ammo ehtimoliy transfer 2026 yilgi Jahon chempionatidan keyin amalga oshadi.
Transfermarkt sayti bo‘yicha Rodrigo de Paulning bozor qiymati 25 million yevroga teng. Hozirgi shartnomasi esa kelasi yozda yakunlanadi.
