Inter kiyinish xonasida Chalhanoglu va Lautaro tortishuvi

Milanning "Inter" futbol klubi Hakan Chalhanoglu va Lautaro Martines o‘rtasidagi vaziyat sababli qiyinchiliklarga duch kelishi mumkin. Bu haqida Euro-football.ru xabar berdi.

Jahon chempionatining 1/8 finalida "Fluminense" jamoasiga 0:2 hisobida mag‘lub bo‘lgandan so‘ng, jamoa sardori Martines bergan intervyuda jamoa a’zolaridan birortasi klub uchun o‘ynamoqchi emasligini aytib, bunday o‘yinchilarni jamoani tark etishga chaqirdi. Biroz o‘tgach, "Neradzurri" prezidenti Juzeppe Marotta esa yanada hayratlanarli bayonot berdi: "Lautaro Chalhanoglu haqida gapirdi".

Jurnalist Paskuale Guarro xabar berishicha, bu voqeadan so‘ng jamoa ichida ziddiyat yuzaga keldi. Ba’zi futbolchilar sardorni qo‘llab-quvvatlagan bo‘lsa, ko‘pchilik Chalhanoglu tomonida turib, bunday masalalarni ommaga oshkor qilish noto‘g‘ri ekanligini ta’kidladi.

Turkiyalik futbolchiga "Galatasaray" jiddiy qiziqish bildirayotgani ma’lum. Istanbul klubi vaziyatdan xabardor bo‘lib, Chalhanoglu ta’tilidan qaytgach, "Inter" kiyinish xonasidagi mojaro yanada kuchayishini taxmin qilmoqda.

Shu sababli milanliklar yarim himoyachini o‘zlari uchun foydasiz shartlarda ham sotishga majbur bo‘lishi mumkin. Bu holat jamoaning ichki muhitiga salbiy ta’sir ko‘rsatishi ehtimoldan holi emas.