Artyom Dovbik - so'nggi yangiliklar

Italiyaning «Roma» klubi hujumchisi Artyom Dovbik yana bir bor Ispaniya chempionatiga qaytishi mumkin. Bu haqda Ispaniyaning "Todofichajes" nashri xabar tarqatdi. Manba ma’lumotlariga ko‘ra, 27 yoshli ukrainalik forvard o‘zining sobiq jamoasi — "Jirona" klubiga qayta qo‘shilish imkoniyatini jiddiy o‘rganmoqda. Futbolchi o‘zining bu qarorini "Jirona" klubining Ispaniya La Ligasida qolishi bilan bog‘lagan. Agar kataloniyaliklar mamlakat chempionatida o‘z o‘rnini saqlab qolsa, Dovbik ushbu taklifni qabul qilishga tayyorligini aytgan. Hozirgi vaqtda "Jirona" jamoasi Ispaniya chempionatida og‘ir mavsumni boshdan kechirmoqda. Kataloniyaliklar La Liga turnir jadvalida 33 ta o‘yindan keyin 35 ochko jamg‘argan holda 16-o‘rinda borishmoqda va ular oldida hali jiddiy sinovlar mavjud. Eslatib o‘tamiz, Artyom Dovbik 2024 yilning avgust oyida katta shov-shuvlar bilan «Roma» klubiga kelib qo‘shilgan edi. Uning Rim jamoasi bilan imzolagan shartnomasi 2029 yilning iyun oyi oxirigacha amal qiladi. Biroq, u hozirda A Seriyada o‘zining eng yaxshi futbolini namoyish qilayotganiga qaramay, kelgusida Ispaniyadagi faoliyatini tiklash niyatida ekanligi ma’lum qilinmoqda. Ayni vaqtda Transfermarkt portali Dovbikning transfer qiymatini taxminan 30 million yevroga baholamoqda. Bu esa "Jirona" uchun sezilarli xarajat bo‘lishi mumkin. Shuning uchun ham futbolchining Ispaniyaga qaytishi masalasi moliyaviy jihatdan "Jirona"ning La Ligada qolishi bilan bevosita bog‘liq bo‘ladi. Shuni alohida qayd etish lozimki, Dovbik bu mavsumda «Roma» safida ham jiddiy o‘yinlar o‘tkazmoqda. Uning Italiyadagi debyut mavsumidagi harakatlari muxlislarning katta e’tiboriga sabab bo‘ldi. Joriy mavsumda forvard 30 dan ziyod uchrashuvda ishtirok etib, jamoasining muhim futbolchilaridan biriga aylandi. Hozircha futbolchi yoki klub tomonidan rasmiy ma’lumot yo‘q. Lekin mavsum yakunlangach, bu transfer masalasi yanada aniqroq ko‘rinishga ega bo‘ladi.

Italiya chempionatining 35-turidan o‘rin olgan muhim uchrashuvda "Roma" o‘z maydonida Florensiyaning "Fiorentina" klubini qabul qildi. Rimliklar bu bahsni ham g‘alaba bilan yakunlab, Yevropa Chempionlar ligasi uchun kurashda yana bir ulkan qadamni tashladi. Bu o‘yinda ham asosiy qahramonlardan biri O‘zbekiston milliy terma jamoasining sardori Eldor Shomurodov bo‘ldi. Bellashuvning birinchi bo‘limi yakunlanayotgan bir paytda hamyurtimiz raqib jarima maydonida juda qiyin vaziyatda qolganiga qaramay, o‘z mahoratlarini ishga solib, to‘pni bosh bilan ukrainalik hamkasbi Artyom Dovbikka aniq yetkazib berdi. "Fiorentina" darvozaboni David de Xea esa bu zarbaga qarshi chora topa olmadi. Bu gol butun o‘yin davomida yagonaligicha qoldi va "bo‘rilar"ga juda zarur bo‘lgan uch ochkoni keltirdi. E’tiborli jihati, Eldor o‘tgan turda ham "Inter"ga qarshi o‘yinda yagona va hal qiluvchi golga assistentlik qilgan edi. O‘zbek hujumchisi aynan shunday muhim vaziyatlarda ishtirok etib, "Roma" muxlislari yuragidan munosib o‘rin egallab ulgurdi. Shomurodovning o‘yindan oldin bergan intervyusi ham bu borada e’tiborga molikdir. "Roma"ning hujum chizig‘ida Artyom Dovbik bilan birga harakat qilish unga qulaylik tug‘dirayotganini aytib o‘tgan hujumchi bu so‘zlarini amalda ham isbotladi. Eldor Shomurodov SKY hamda DAZN telekanallari muxbirlari bilan suhbatlashib, o‘yin va jamoa haqidagi fikrlari bilan o‘rtoqlashdi. Quyida futbolchining intervyusi to‘liq holda havola qilinadi: — "Roma"ning yuqori tempdagi o‘yin uslubi sizga yoqayaptimi? — Ha, bu biz uchun qulay va ko‘nglimizga yoqadigan uslub. Har qanday raqibga qarshi maydonga tushsak-da, yagona maqsadimiz – g‘alaba qozonish. — Hujum chizig‘ida ikki markaziy forvard bilan o‘ynash raqib jamoalarni ko‘proq tashvishga solayaptimi? — Menimcha, unday emas. Biz har qanday vaziyatda ham vazmin va xotirjam harakat qilishga harakat qilamiz. Artyom bilan maydonda bir-birimizni yaxshi anglayapmiz, doim muloqot qilib turibmiz. Lekin biz uchun u yoki boshqa futbolchi bilan o‘ynashda katta farq yo‘q, chunki barchamiz har doim tayyormiz. — Artyom Dovbik bilan o‘ynash siz uchun qanday taassurot qoldirmoqda? — Ikkimiz ham tabiiy hujumchilarmiz. Har ikkimiz maydonda qanday o‘ynash va qanday harakat qilishni juda yaxshi bilamiz. Buning natijasida ishimiz ham sezilarli darajada yengillashyapti. — Bir-biringizni maydonda so‘zsiz tushunish paydo bo‘ldimi? — Ha, bu borada muammo yo‘q, biz bir-birimizni ko‘z bilan ham tushunishimiz mumkin. — "Roma"ning bu mavsumgi muvaffaqiyatining asosiy siri nimada, deb o‘ylaysiz? — Agar buni aytsam, sir bo‘lmay qoladi-da (kuladi). Menimcha, hamma narsa o‘z qo‘lingizda. Maydonga tushib bor kuchingiz bilan harakat qiling, qolgani keyin keladi. "Roma"dagi muvaffaqiyatning siri ham mana shunda. — Bosh murabbiy Klaudio Raneri haqida qanday fikrdasiz? — Raneri ajoyib inson va kuchli murabbiy. Uning talablarini yaxshi tushunaman va ularni to‘liq bajarish uchun maydonda harakat qilaman. Eslatib o‘tish joizki, Eldor Shomurodov bu mavsumda A Seriya, Italiya kubogi hamda Yevropa ligasida jami 34 ta bahsda maydonga tushib, o‘z hisobiga 7 ta gol va 5 ta golli uzatmani yozdirib qo‘ygan. Hozirda “Roma” mavsumni yuqori o‘rinlarda yakunlash uchun hal qiluvchi uchrashuvlarga tayyorgarlik ko‘rmoqda. Rimliklarning keyingi raqiblari “Atalanta”, “Milan” va “Torino” bo‘ladi. Eldor Shomurodovning esa keyingi uchrashuvlarda ham jamoasiga muhim yordam ko‘rsatishi kutiladi.

“Roma” A Seriyaning 33-turida “Verona”ga qarshi juda murakkab o‘yin o‘tkazdi. Bu bahs oldidan Artyom Dovbik chap tizzasida kichik muammo borligi ma’lum bo‘lgan edi va shu bois, Klaudio Raneri ilk daqiqalardan Eldor Shomurodovni maydonga tushirdi. Ekspertlar ta’kidlaganidek, o‘zbek hujumchisi ustozi berayotgan har bir imkoniyatdan maksimal foydalanishga harakat qilyapti. “Verona” bilan bellashuvda ham shunday bo‘ldi. Eldor to‘rtinchi daqiqadayoq, raqib darvozasini ishg‘ol qilib, “Olimpiko”ni “portlatdi”. Aynan mana shu gol “Roma”ning g‘alabasini ta’minladi va “bo‘rilar” Yevropa Chempionlar ligasi yo‘llanmasi uchun kurashish imkonini saqlab qoldi. Nufuzli manba – tuttomercatoweb.com sayti ekspertlari “Roma” futbolchilarining harakatlarini quyidagicha baholadi. Svilar 6 – Birinchi bo‘limni ancha tinch o‘tkazdi, Moskueraning markazga tepgan zarbasini qaytarishdan boshqa jiddiy harakat qilmadi. Ikkinchi bo‘limda ham ko‘p ish tushmadi. Celik 6 – O‘z qanotida tartibli o‘yin o‘tkazib, butun 90 daqiqa davomida jamoa himoyasiga yaxshi mustahkamlik berdi. Mancini 6 – Markaziy himoyada yaxshi o‘ynadi va raqib hujumchilariga imkon bermadi. Faqat bir marta, ikkinchi bo‘lim boshida Moskuera uni ortda qoldirib ketdi, lekin gol bo‘lmadi. Ndicka 6 – Verona jamoasi hujum qilgan paytlarda yaxshi yopildi va himoya chizig‘ini to‘ldirib turdi. Umuman olganda tinch kechgan kecha. Saelemaekers 6 – O‘ng qanotda yetarli darajada o‘ynadi, ko‘zga tashlanadigan harakatlari bo‘lmadi, lekin jiddiy xatoga yo‘l qo‘ymadi. 70-daqiqadan Dovbik 6 – Raneri tomonidan dastlab asosiy tarkibga kiritilmaganidan keyin, maydonga yaxshi kayfiyat bilan tushdi va hatto hisobni 2:0 qilishga yaqin keldi. Koné 6,5 – Kristante kabi golda ishtirok etgan ajoyib harakatlar qilmadi, biroq maydonning eng muhim hududida o‘zini sezdirib turdi. Ikkinchi bo‘limda hujumga faol qo‘shildi. Cristante 6,5 – Raneri jamoasining eng yaxshilaridan biri bo‘ldi, ayniqsa birinchi bo‘limda. Yarim himoyada yaxshi o‘ynab, Shomurodovning goliga sababchi bo‘lgan kombinatsiyani boshladi. Angelino 5,5 – "Leypsig"ning sobiq o‘yinchisi bu safar u qadar yaxshi ko‘rinish bermadi, hujumda ham ko‘p yordamchi bo‘lolmadi. Bundan tashqari, bir necha marta Tchatchuaga qarshi qiyinchilikka uchradi. Soulé 7 – "Roma"ga derbida 1 ochko taqdim qilganidan keyin ham ajoyib formasini saqlab qoldi. Shomurodovning goliga assistentlik qilishdan tashqari, bir necha marta o‘zi ham vaziyatlar yaratib, hujum va himoyada samarali harakat qildi. 82-daqiqada o‘rnini Renshga bo‘shatib berdi. Baldanzi 5 – Asosan chap qanotda harakat qildi, lekin kutilganidek o‘yinni jonlantira olmadi. Ikkinchi bo‘lim boshida amalga oshirgan, nostik aniq ketmagan zarbasidan boshqa yodda qolarli harakati bo‘lmadi. 63-daqiqadan Pizilli 6 – "Roma" yarim himoyasiga yangi kuch bag‘ishladi va o‘yin so‘nggidagi keskinlikka qarshi turishda yordam berdi. Shomurodov 7,5 – Dovbik o‘rniga asosiy tarkibda tushib, o‘z imkoniyatini ideal tarzda ishlatdi. 4-daqiqadayoq jamoasi uchun g‘alaba golini kiritdi. Boshqa ko‘plab vaziyatlarda ko‘rinmagan bo‘lsa-da, maydonda bo‘lgan paytida barcha kuchini jamoadoshlari uchun ishlatdi. Mavsum so‘nggida Chempionlar ligasi yo‘lida muhim rol o‘ynadi. 82-daqiqada o‘rniga El Shaaravi maydonga tushdi. Claudio Ranieri 6,5 – Uning jamoasi "Yuventus" va "Latsio"ga qarshi duranglardan keyin g‘alaba qozondi. Mukammal bo‘lmasada, jamoasi zarur bo‘lgan g‘alabani qo‘lga kiritdi. Chempionlar ligasi uchun kurashda umidlarni saqlab qolishga yordam beruvchi natija bo‘ldi.

Klaudio Raneri qo‘l ostida A Seriyada mag‘lubiyatsiz seriyasini davom ettirayotgan “Roma” yakshanba kuni o‘ta muhim uchrashuvni o‘tkazadi. Rimliklar chempionatda qariyb to‘rt oydan beri yutqazgani yo‘q va jamoaning g‘alabali seriyasi yettita o‘yinga yetdi. Bu ko‘rsatkichlar musobaqa jadvalining quyi pog‘onalariga tushib qolgan jamoaning yuqoriga ko‘tarilishiga sabab bo‘ldi va endi “Roma” Yevropa Chempionlar ligasining kelasi mavsumi uchun yo‘llanma olish imkoniyatiga ega bo‘lib turibdi. 6 aprelga belgilangan 31-turda oltinchi pog‘onada turgan “Roma” o‘zidan uch ochko ko‘p jamg‘arib, beshinchi o‘rinni egallagan “Yuventus”ni qabul qiladi. Bo‘lajak to‘qnashuvda zafar quchgan jamoaning kuchli to‘rtlikka kirish imkoni sezilarli darajada oshadi. O‘ta muhim uchrashuv oldidan Klaudio Raneri jamoasining o‘yin sxemasini o‘zgartirishga qaror qilgani aytilmoqda. Bunga sabab jamoa yetakchisi Paulo Dibalaning jrohat olib, uzoq muddatga safdan chiqqanidir. Italiya futbolini yoritayotgan manbalar 73 yoshli murabbiy Turin klubiga syurpriz tayyorlayotganini yozmoqda. - Klaudio Raneri “Yuventus”ning himoya qo‘rg‘onini yorib o‘tish uchun Eldor Shomurodov va Artyom Dovbik tandemini ilk daqiqadan o‘ynatishga qaror qildi. Bu ikki hujumchi A Seriyada shu paytgacha faqat to‘rttagina uchrashuvda birga o‘ynagan. Ayniqsa, avvalgi turda “Lechche” bilan bo‘lgan bahsda Artyom Dovbik maydonga Eldor Shomurodov tushganidan keyin aynan uning yordamida g‘alaba to‘pini kirita oldi. O‘zbek legioneri raqib himoyachilari e’tiborini o‘ziga tortib, ukrainalik forvardni ularning ta’qibidan qutqardi va Dovbik darvozani ishg‘ol qildi. Raneri Eldorning xizmatlarini inobatga olib, “Men jamoaga Artyomga qanday to‘p uzatishni aytdim. Shomurodovdek tezkor o‘yinchi unga gol urish uchun sharoit yaratib berdi, Dovbik uning yordamini yoqqol sezdi”, dedi. Ukrainalik hujumchi oldingi chiziqda ko‘pincha yolg‘iz va yordamsiz qolib ketardi. Shomurodov ega bo‘lgan o‘yin xarakteristikasi Dovbikka erkin harakat qilish va paslarni qabul qilish imkonini bermoqda. “Yuventus” bilan bo‘ladigan bahsda ikki hujumchining o‘ynashi foyda keltirishi kutilmoqda. Shomurodovning harakatlari natija qo‘lga kiritilishida muhim omil bo‘lmoqda, - deb yozdi vocegiallorossa.it sayti eksperti Mauritsio Rasa. “Roma” faoliyatini yoritayotgan yana bir manba – laroma24.it sayti ham Eldor Shomurodovning o‘yin uslubi va harakatchanligi Turin superklubi bilan bo‘ladigan bellashuvda poytaxt “bo‘rilari”ga qo‘l kelishini ta’kidlamoqda. - “Roma” ikki markaziy hujumchi bilan o‘ynasa, Eldor Shomurodov keng maydon bo‘ylab harakat qilishiga to‘g‘ri keladi. O‘zbek legioneri hujum markazida Dovbikning ortida va qanotlarni almashtirib hujum uyushtirishi mumkin. Dovbik bo‘lsa, asosiy e’tiborini raqib jarima maydonchasi ichida to‘pni qabul qilib, darvozani nishonga olishga qaratadi. O‘zbek hujumchisi yuqoridan keladigan to‘plar uchun kurashda ishonchli harakat qiladi, bosh bilan zarba yo‘llashi yoki Dovbikka to‘pni olib berishi mumkin, - deb izoh berdi laroma24.it sayti. “Roma” hamda “Yuventus” o‘rtasidagi uchrashuvga mashhur “Olimpiko” arenasi mezbonlik qiladi. Bellashuv 6 aprel kuni Toshkent vaqti bilan 23:45da boshlanadi.

Italiya A Seriyasining 30-turida “Roma” futbolchilari juda murakkab o‘yin o‘tkazdi. Safarda “Lechche” mehmoni bo‘lgan “bo‘rilar” raqib darvozasiga yo‘l topish va himoya chizig‘ini yorib o‘tishda ancha qiynaldi. Tajribali murabbiy Klaudio Raneri o‘yin yakunlanishiga chamasi 20 daqiqa qolganda taktik o‘zgarish qilib, maydonga ikkinchi markaziy hujumchi Eldor Shomurodovni tushirdi. Bu o‘z samarasini berdi va Artyom Dovbik himoyachilar bosimi pasayganidan foydalanib, g‘alaba to‘pini kiritdi. Uchrashuvdan keyin Klaudio Raneri o‘yin haqidagi intervyusida Shomurodovning xizmatlarini ham e’tirof etdi. - O‘yin boshida “Roma” ikkita qulay vaziyatni boy berdi. Oxirigacha g‘alabaga ishonganmidingiz? - Har doim oxirigacha kurashish kerak, bu juda qiyin bahs bo‘ldi. O‘zimiz ikkita vaziyatni qo‘ldan chiqarganimizdan keyin raqibga darvozamizga xavf solish imkonini berdik. Bellashuvning ikkinchi yarmida kurash yanada kuchaydi, lekin g‘alaba qozonishimiz zarur edi. Biz ligada qolish uchun kurashayotgan jamoaga qarshi to‘p tepdik va shu bois ochko olish qiyinligini bilardik. - Dovbikka baho berishda faqat samaradorligini inobatga olish kerakmi? - Yo‘q, undan ko‘proq narsa talab qilib, ishtiyoqini kuchaytirish kerak. Biz bu ishni har kuni amalga oshiryapmiz va harakat qilyapti. U maydon ichkarisidan to‘p uzatilganda kuchli hujumchiga aylanadi. Biz esa doim ham unga bunaqa pas bera olmayapmiz. - Musobaqa jadvalida yuqori o‘rindagilarga qarayapsizmi? - Yo‘q, men o‘z o‘yinchilarimga e’tibor qaratyapman. Ularga yozda ortimizga qaraganimizda, hech narsadan afsus chekmasligimiz kerakligini, buning uchun maydonda natija ko‘rsatish uchun qo‘limizdan kelganini qilishimiz lozimligini uqtirdim. Ular har bitta to‘p uchun kurashishi shart. Oldimizda sakkizta uchrashuv bor va ularning har biri bugungidek qiyin o‘tadi. - Dovbikning bor imkoniyati shumi yoki hali ochilmagan qirralari bormi? - O‘ylashimcha, uning salohiyati katta. Sekin-asta ochilib boryapti va bir nechta gol ham urdi. U xotirjam o‘ynashni o‘rganishi kerak, lekin bu oson bo‘lmaydi. Men unga “sen uchun gollar muhim, lekin har bitta to‘p uchun kurashishing lozim”, dedim. - Maydonga Eldor Shomurodovni tushirib, Dovbikning ishini osonlashtirdingiz va u shundan keyin g‘alaba golini urdi... - Ha, raqib himoyachilaridan ikki nafari Dovbikni muntazam qo‘riqlab turdi. Artyom o‘ziga bo‘lgan ishonchni yo‘qota boshladi. Ana shu vaziyatda unga o‘z yelkasini tutib, ko‘mak bera oladigan Shomurodovdek o‘yinchini tushirdim. Eldor Dovbik katta yordam kelganini his qilishi uchun barcha imkoniyatlarni yaratib berdi. - Ikki oy oldin jamoa to‘rtinchi o‘rin uchun kurashni orzu qilsa bo‘larmidi? - Jamoaga kelganimda ishlash uchun shu yerda ekanimni aytganman. Men hech qanday va’da bermayman, faqat maqsad sari intilaman va o‘yinchilarimda ham xuddi shu holatni ko‘rishni istayman. O‘z ishimni oxirigacha yetkazib qo‘ya olishimga umid qilaman. Shuni va’da bera olamanki, o‘rnimga keladigan yangi murabbiy mendan yosh bo‘ladi. Yevropa Chempionlar ligasiga chiqsak ham, bu omil meni jamoada olib qololmaydi.

Italiya A Seriyasining 30-turida “Roma” safar uchrashuvida qiyin g‘alabani qo‘lga kiritdi va Yevropa Chempionlar ligasi yo‘llanmasi uchun kurashni davom ettiradigan bo‘ldi. “Lechche” jamoasi mezbonlik qilgan bellashuvda yagona golni Artyom Dovbik kiritdi. Biroq bosim ostida qolib ketgan ukrainalik hujumchining o‘yini maydonga Eldor Shomurodov tushirilganidan keyin ochildi. Shu tariqa, “Roma” chempionatdagi qatorasiga yettinchi g‘alabasini qo‘lga kiritdi va mag‘lubiyatsiz seriyasini 14 ta uchrashuvga yetkazib oldi. Italiya futbolini yoritib kelayotgan tuttomercatoweb.com portali “Roma” futbolchilarining harakatlarini quyidagicha baholadi: Svilar 6: Uchrashuv darvozabon uchun ancha xotirjam o‘tdi. Birinchi bo‘limda raqib futbolchisi Galloning xavfli zarbasini bartaraf etdi va o‘z darvozasi daxlsizligini saqlab qoldi. Manchini 6: Birinchi bo‘limda himoyada biroz muammolarga duch kelgan bo‘lsa-da, o‘yinning ikkinchi yarmida hammasini o‘z nazoratida ushlab turdi. Hujum uyushtirishni ham unutmadi. Ikkinchi bo‘limda urgan goli inobatga olinmadi. Xummels 6,5: Raqibning eng xavfli hujumchisi Kristovichga qarshi o‘ynagan nemis futbolchisi raqobatchisiga o‘yin bermadi. Himoya markazini mustahkam ushladi. Ndika 6: O‘yinning birinchi yarmida Raneri jamoasida eng zo‘r o‘yinchilardan bo‘ldi. Keyin biroz harakatlari bo‘shashganiga qaramay, yuqori darajada harakat qildi. Salemakers 5,5: “Milan” va “Bolonya”ning sobiq futbolchisi o‘ng qanotdan o‘rin egalladi. Biroq raqib futbolchisi Galloni to‘xtatishda ancha qiyinchilikka duch keldi. Kristante 6: Butun uchrashuv davomida maydon markazida ustunlikni ta’minlashga harakat qildi. Kone 5,5: Fransiyalik futbolchi bu gal o‘z darajasida o‘ynay olmadi. Maydon markazida ko‘p xato qildi. Gol urish imkoniyatidan foydalana olmadi. Anjelino 5,5: Bellashuvda hisobni ochishga yaqin edi, lekin qulay vaziyatni boy berdi. Bir vaziyatda jamoasini goldan qutqardi va bu orqali boshqa kamchiliklarini yuvdi. Sule 5,5: Safdan chiqqan Dibalaning yo‘qligini bildirmasligi kerak edi. Biroq bu murakkab vazifani yetarli darajada bajara olmadi va o‘rnini 72-daqiqada Eldor Shomurodovga bo‘shatib berdi. Shomurodov 6: O‘yinga faol qo‘shildi va Artyom Dovbikka raqib himoyachilari tomonidan bo‘layotgan bosimni yengillashtirdi. Uchrashuv oxirida o‘zi ham gol urishi mumkin edi. Biroq raqib darvozaboni Falkone Eldorning zarbasini bartaraf etdi. Pellegrini 5: Raneri tajribali futbolchiga ilk daqiqalardan o‘ynash va maydon markazida hujumkorlikni ta’minlash imkonini berdi. Biroq “Roma” sardori kutilgan o‘yinni namoyish qila olmadi va 72-daqiqada o‘rniga Baldansi tushirildi. Baldansi 6: Uchrashuvga yaxshi ta’sir o‘tkazdi va rimliklarning hujumini kuchaytirishga erishdi. Dovbik 7: Ukrainalik hujumchi uchun qiyin o‘yin bo‘ldi. Raqib himoyachisi Gaspar uni yopib qo‘ydi. Shomurodov o‘yinga qo‘shilganidan keyin bellashuv yakunlanishiga o‘n daqiqa qolganda yagona imkoniyatidan unumli foydalanib qoldi. Klaudio Raneri 6,5: Juda muhim g‘alaba qo‘lga kiritildi. Chunki Yevropa Chempionlar ligasi yo‘llanmasi uchun kurashdagi raqobatchilar – “Bolonya” va “Yuventus” ham uchtadan ochkoni qo‘lga kiritgan edi. Uchrashuvda Artyom Dovbikni maydonda qoldirib, yordamga Eldor Shomurodovni tushirgani o‘z samarasini berdi.

Bugun, 7 sentyabr kuni, O‘zbekiston osmonida noyob astronomik hodisa — to‘liq Oy tutilishi yuz beradi. Bu haqida Zamin.uz xabar berdi. O‘zbekiston Fanlar akademiyasining ma’lumotlariga ko‘ra, ushbu hodisa mamlakatimizning barcha hududlaridan aniq ko‘rinadi. Oy tutilishi paytida Oy yuzasi butunlay Yer soyasida qoladi. To‘liq fazali tutilish 1 soat 22 daqiqa davom etadi, biroq butun jarayon 5 soatdan ortiq vaqtni o‘z ichiga oladi. Bu hodisa nafaqat O‘zbekistonda, balki Evroosiyo va Afrikadagi bir qator davlatlarda ham kuzatiladi. Jumladan, Qozog‘iston, Qirg‘iziston, Tojikiston, Turkmaniston, Afg‘oniston, Eron, Arab davlatlari, shuningdek, Pokiston, Hindiston, Xitoy, Janubiy va Shimoliy Koreya, Malayziya, Vyetnam, Laos kabi mamlakatlarda to‘liq Oy tutilishini ko‘rish mumkin. Rossiyaning markaziy hududlari, Turkiya, Ozarbayjon, Saudiya Arabistoni, Yaponiya va Avstraliyaning ayrim joylarida ham Oy to‘liq soyada qoladi. Yevropa, Filippin, Gavayi, Fidji va Yangi Zelandiya esa qisman tutilishni kuzatadi. O‘zbekistonda Oy tutilishining aniq vaqtlari quyidagicha: qisman tutilish Toshkent vaqti bilan 21:27 da boshlanadi, to‘liq faza 22:30 da kirib keladi, 23:11 da eng yuqori nuqtaga yetadi, 23:52 da to‘liq faza yakunlanadi va 8 sentyabr soat 00:56 da qisman faza ham tugaydi. Mutaxassislar ma’lumotiga ko‘ra, tutilish davomida Oyning ufqdan balandligi dastlab 27 darajani tashkil etadi, maksimal paytda esa 39 darajagacha ko‘tariladi. Eng muhimi, ushbu hodisani kuzatish uchun teleskop yoki boshqa maxsus uskunalar talab qilinmaydi. Oddiy ko‘z bilan ham Oy tutilishini xavfsiz tomosha qilish mumkin. Olimlar ta’kidlaganidek, Oy tutilishini bevosita ko‘z bilan kuzatish mutlaqo xavfsiz hisoblanadi. Astronomiya ixlosmandlari va oddiy fuqarolar uchun bu kecha tabiatning noyob go‘zalligini ko‘rish va esda qolarli xotira yaratish uchun ajoyib imkoniyatdir. Manba: O‘zbekiston Fanlar akademiyasi.

Apple kompaniyasi sentabr oyida o‘zining yangi flagman smartfonlari iPhone 17 Pro va iPhone 17 Pro Max modellarini taqdim etdi. Bu haqida Zamin.uz xabar berdi. Ushbu qurilmalar nafaqat ichki imkoniyatlari, balki tashqi ko‘rinishi bilan ham sezilarli darajada yangilangan. Eng katta o‘zgarishlardan biri orqa kamera podining butun korpus eni bo‘ylab joylashganidir. Sensorlar joylashuvi avvalgidek qolgan, ammo LiDAR va chaqnoq endi qarama-qarshi tomonda joylashgan. Apple titan korpusdan voz kechib, alyuminiy korpusga qaytdi. Alyuminiy issiqlikni oldingiga nisbatan 20 barobar samaraliroq tarqatadi. Korpus to‘liq metall bo‘lib, orqa qismida simsiz zaryadlash uchun Ceramic Shield oynali maydon mavjud. Old panelda yangi Ceramic Shield 2 ishlatilgan bo‘lib, u uch barobar mustahkamroqdir. Shuningdek, ekran yuzasida yorug‘likni aks ettirmaydigan qoplama qo‘llanilgan. Ichki quvvat jihatidan yangi Apple A19 Pro chipi o‘rnatilgan. U 6 yadroli protsessor va 6 yadroli grafik protsessorga ega bo‘lib, ikkinchi avlod Dynamic Caching texnologiyasi yordamida uzoq davom etadigan vazifalarda oldingiga nisbatan 40 foiz tezroq ishlaydi. Pro modellarda birinchi marta bug‘ yordamida sovitish tizimi joriy etilgan bo‘lib, alyuminiy korpus bu jarayonga yordam beradi. Kamera tizimi ham sezilarli yangilangan. Endi to‘liq 48 megapikselli asosiy, ultra keng va telefotokameralar mavjud. Telefotokamera 8 barobar optik zoom, shuningdek 4 barobar rejimi va 3D stabilizatsiya funksiyasiga ega. Old kamera esa 18 megapikselli bo‘lib, Center Stage texnologiyasi bilan jihozlangan. Bundan tashqari, ProRes RAW formatida video yozish imkoniyati qo‘shilgan, bu esa videomontaj bilan shug‘ullanuvchilar uchun muhim yangilik hisoblanadi. Avtonomiya ko‘rsatkichlariga kelsak, iPhone 17 Pro modeli 33 soat video ko‘rish imkoniyatiga ega, iPhone 17 Pro Max esa 39 soat ishlaydi. Qurilmalarni 0 dan 50 foizgacha zaryadlash uchun atigi 20 daqiqa vaqt ketadi. Narxlari quyidagicha belgilangan: iPhone 17 Pro 1099 dollar, iPhone 17 Pro Max esa 1199 dollar. Qurilmalar 19 sentabrdan sotuvga chiqadi. Ranglar qatorida Silver, Deep Blue va Cosmic Orange mavjud. Yangi TechWoven g‘iloflar va Crossbody Strap aksessuar sifatida taqdim etildi. Apple kompaniyasi ushbu yangilanishlar bilan haqiqatan ham “Pro” darajasiga chiqa oldimi, bu savol foydalanuvchilar orasida muhokama qilinmoqda. Yangi modellar yuqori darajadagi quvvat va sifatni taqdim etadi, bu esa ularning bozordagi o‘rnini mustahkamlashga yordam beradi.

Turkiyadan hayratlanarli yangiliklar kelmoqda. Bu haqida Euro-football.ru xabar berdi. Ma’lumotlarga ko‘ra, Zinedin Zidan «Fenerbahche» futbol klubining yangi bosh murabbiyi bo‘lishi mumkin. Klub rahbariyati yozda jamoani sezilarli darajada kuchaytirganidan so‘ng, Zidan bilan dastlabki kelishuvga erishgan. 53 yoshli murabbiy maosh va shart-sharoitlar bo‘yicha muzokaralar yakunlangach, Turkiyaga ko‘chib o‘tadi, deb xabar beradi Sabah Spor nashri. Eslatib o‘tamiz, yaqinda «Fenerbahche» jamoasi bosh murabbiyi Joze Mourinyo bilan xayrlashdi. Bu qaror Stambul «kanarichkalari» Chempionlar Ligasi saralash bosqichida «Benfika»ga yutqazgach qabul qilindi. Oldinroq matbuotda Zinedin Zidan Fransiya terma jamoasi bosh murabbiyi Didye Deshamning o‘rnini egallashni rejalashtirayotgani haqida xabarlar tarqalgan edi. Desham ushbu lavozimni 2026 yilgi jahon chempionati yakunida tark etishi kutilmoqda. Bu yangiliklar futbol ixlosmandlari orasida katta qiziqish uyg‘otmoqda.

Avvalroq Angrenda yuz bergan yirik yo‘l-transport hodisasi haqida xabar berilgandi. Bu haqida Upl.uz xabar berdi. Toshkent–Osh xalqaro avtomobil yo‘lida bir nechta transport vositalari ishtirokida avtohalokat sodir bo‘ldi. Hodisa 7-sentyabr kuni soat taxminan 12:20 da yuz berdi. Ichki ishlar organlaridan olingan ma’lumotlarga ko‘ra, Shacman rusumli yuk mashinasi, unda sement tashilayotgan va 44 yoshli haydovchi boshqaruvida bo‘lgan, boshqaruvni yo‘qotib, temiryo‘l o‘tish joyida to‘xtab turgan ikkita yuk mashinasi va beshta yengil avtomobilga urildi. Zarba natijasida yong‘in yuzaga keldi, ammo voqea joyiga yetib kelgan tezkor xizmatlar tomonidan tezda o‘chirilgan. Ichki ishlar organlari o‘lim va jarohat olganlar soni haqida ma’lumot berdi. Hodisa joyida yetti kishi halok bo‘ldi. Besh kishi shifoxonaga yotqizildi, yana to‘rt nafar ishtirokchi tibbiy yordam olib, uyiga yuborildi. Hozirgi vaqtda hukumat hodisaning sabablarini o‘rganish uchun komissiya tuzdi. Komissiyaga boshchilik qilish uchun Bosh vazir o‘rinbosari Achilbay Ramatov tayinlandi.

Shimoliy Karolinada 23 yoshli ukrainalik qochqin Irina Zarutska poyezdda pichoqlab o‘ldirildi. Bu haqida Zamin.uz xabar berdi. Politsiya ayolga hujum qilgan 34 yoshli Dekarlos Braunni qo‘lga oldi va uni qotillikda ayblamoqda. Voqea videoga tushib, ijtimoiy tarmoqlarda keng tarqaldi, bu esa jamoatchilik orasida katta norozilikka sabab bo‘ldi. Shahar meri ushbu holatni sud tizimidagi xato deb atab, transportda xavfsizlikni oshirish bo‘yicha choralar ko‘rilishini va’da qildi. Zarutskaning oilasi uning 2022-yilda urushdan qochib AQShga kelganini va yangi hayotga tez moslashganini bildirdi. U san’atga qiziqardi, hayvonlarni yaxshi ko‘rar va oilasi bilan baxtli yashardi. Ushbu voqea siyosiy bahslarga ham sabab bo‘ldi. Ayrimlar Braun ilgari og‘ir jinoyatlar uchun jazolangan bo‘lsa-da, ozodlikka chiqqanini tanqid qildi. Shtat rahbari esa jinoyatchilikka qarshi yanada samarali choralar ko‘rishga chaqirdi. Bu voqea jamiyatda xavfsizlik va adolat masalalarini yana bir bor muhokama qilishga sabab bo‘ldi.

Sidneyda katta akula hujumi natijasida bir kishi halok bo‘ldi. Bu haqida Zamin.uz xabar berdi. Jabrlanuvchi Long Reef plyajida do‘stlari bilan cho‘milayotgan paytda akula hujumiga uchradi. Qutqaruvchilar uni qirg‘oqqa olib chiqdilar, ammo uning hayotini saqlab qolib bo‘lmadi. Ma’lum bo‘lishicha, jabrlanuvchi suvda atigi yarim soat bo‘lgan, hujum esa qirg‘oqdan taxminan 100 metr uzoqlikda sodir bo‘lgan. Hodisa yuzasidan Shimoliy plyajlar hududidagi bir nechta mashhur sohillar vaqtincha yopildi. Mutaxassislar ushbu sohillar 24 dan 72 soatgacha yopiq qolishi mumkinligini bildirgan. Politsiya aynan qaysi turdagi akula hujum qilganini aniqlash uchun tekshiruv olib bormoqda. Sidneyda oxirgi marta o‘limga olib kelgan akula hujumi 2022-yilda qayd etilgan edi. Avstraliyada yiliga o‘rtacha 20 ta shunday hodisa sodir bo‘ladi. Ushbu voqea mamlakatda akulalar xavfi borligini yana bir bor eslatdi. Odamlar sohil bo‘ylab ehtiyotkorlikni oshirishlari zarur. Qutqaruv xizmatlari ham plyajlarda xavfsizlikni ta’minlashni kuchaytirmoqda.

Ispaniyada yosh futbolchilar o‘rtasida xalqaro futbol turniri bo‘lib o‘tmoqda. Bu haqida Upl.uz xabar berdi. O‘zbekistonning 17 yoshgacha bo‘lgan terma jamoasi turnirning ikkinchi bosqichida Kanada terma jamoasi bilan bellashdi. Asosiy vaqt davomida o‘yin 2:2 hisobida yakunlandi. Penaltilar seriyasida O‘zbekiston jamoasi 6:5 hisobida g‘alaba qozondi. Birinchi bosqichda O‘zbekiston terma jamoasi Angliya jamoasiga 3:1 hisobida mag‘lub bo‘lgan edi. Terma jamoa xalqaro musobaqalarda ishtirok etishni davom ettirib, tajriba orttirishga harakat qilmoqda. Bu kabi musobaqalar yosh futbolchilar uchun muhim bo‘lib, ularning mahoratini oshirishga xizmat qiladi. O‘zbekiston futboli kelajakda yanada rivojlanishi uchun yoshlar o‘rtasidagi bunday turnirlar katta ahamiyatga ega. Terma jamoaning keyingi o‘yinlari ham qiziqish bilan kuzatilmoqda.

Domeniko Tedesko «Fenerbahche» jamoasining bosh murabbiyi lavozimiga asosiy nomzodlardan biridir. Bu haqida Euro-football.ru xabar berdi. Turkiya klubida portugaliyalik murabbiy Joze Mourinyu bilan xayrlashilgandan so‘ng yangi bosh murabbiy qidirilmoqda. «Kanareykalar» rahbariyati Tedesko nomini qisqa ro‘yxatga kiritgan va italiyalik mutaxassis bu lavozimni egallashga tayyor ekanligini bildirgan, deb xabar beradi mashhur jurnalist Nikolo Skira. Agar hammasi reja bo‘yicha amalga oshsa, 39 yoshli mutaxassis 2027 yilgacha Istanbulning yirik klubida shartnoma imzolaydi. Domeniko Tedesko so‘nggi ish joyi Belgiya milliy terma jamoasi bo‘lib, u yerda 2023 yil fevralidan 2025 yil yanvarigacha bosh murabbiylik qilgan. Bundan avval u «RB Leyptsig», Moskva «Spartak», «Shalke 04» kabi yirik klublarda ham faoliyat yuritgan. Uning murabbiylik tajribasi va yirik jamoalarda ishlaganligi «Fenerbahche» uchun katta imkoniyat bo‘lishi mumkin. Klub yangi murabbiy bilan kelgusida muvaffaqiyatlarga erishishni maqsad qilgan.