Toshkent shahrida ilg‘or sun’iy intellekt texnologiyalari bilan jihozlangan innovatsion Vaziyatlarni monitoring qilish markazi faoliyat boshladi. Bu haqida Upl.uz xabar berdi.
Markazning asosiy maqsadi poytaxtdagi transport oqimlarini tahlil qilish va boshqarish orqali yo‘l harakati sharoitlarini tubdan yaxshilashdir. Bu esa tirbandliklarni sezilarli darajada kamaytirish va yo‘l harakati xavfsizligini oshirishga xizmat qiladi.
Markaz yo‘l harakati xavfsizligini raqamlashtirish, yo‘l-transport hodisalarini oldini olish hamda tirbandliklarni oldindan prognoz qilish vazifalarini bajaradi. U Toshkent shahar Ichki ishlar boshqarmasi yo‘l-patrul xizmatining yangilangan ma’muriy binosida tashkil etildi.
O‘zbekiston Respublikasi Ichki ishlar vazirligi matbuot xizmati bu haqda ma’lumot berdi. Markazning asosida real vaqt rejimida transport oqimlarini kuzatish, tahlil qilish va samarali boshqarish imkonini beruvchi intellektual transport platformasi yotadi.
Ichki ishlar vazirligi vakillari ta’kidlashicha, ushbu tizimning joriy etilishi natijasida tirbandliklar 50 foizga kamayadi, yo‘lovchilarning yo‘lda sarflaydigan vaqti qisqaradi, avariyalar soni kamayadi, favqulodda xizmatlarning javob berish tezligi oshadi hamda aniq statistika asosida qaror qabul qilish samaradorligi yaxshilanadi. Bundan tashqari, yo‘l-patrul va patrul-post xizmatlariga yagona tizimda ishlash uchun maxsus jihozlangan 40 ta yangi Cobalt avtomobili topshirildi.
Ushbu avtomobillarda markaz bilan to‘g‘ridan-to‘g‘ri bog‘langan kameralar mavjud bo‘lib, ular qidiruvdagi shaxslar, o‘g‘irlangan transport vositalari hamda jamiyat xavfsizligiga tahdid soluvchi boshqa vaziyatlar haqida ma’lumotlarni uzatadi. Markaz esa xizmat avtomobillaridagi barcha kameralarni masofadan boshqarish imkoniga ega.
