O‘zbekiston Respublikasi Yo‘l harakati xavfsizligi bosh boshqarmasi haydovchilik guvohnomasidan mahrum etilgan shaxslar uchun hujjatlarni tiklash tartibi bo‘yicha batafsil tushuntirish berdi. Bu haqida Upl.uz xabar berdi.
Ushbu jarayon bir necha majburiy bosqichlardan iborat bo‘lib, ularning barchasi haydovchining yana xavfsiz transport vositasini boshqarishga tayyorligini tasdiqlashga qaratilgan. Haydovchilik guvohnomasidan mahrum qilish muddati tugagach, fuqaro bir qator talablarni bajarishi lozim.
Avvalo, u tibbiy ko‘rikdan o‘tishi kerak, bu orqali uning sog‘lig‘i avtomobil boshqarishga yaroqliligi aniqlanadi. Keyingi bosqichda yo‘l harakati qoidalari bo‘yicha bilimlarni yangilash va haydash ko‘nikmalarini mustahkamlash uchun maxsus tayyorgarlik kurslarini o‘tash zarur.
Jarayonning yakuniy qismida nazariy va amaliy imtihonlardan muvaffaqiyatli o‘tish talab etiladi. Faqat shu shartlar bajarilgandan so‘ng haydovchilik guvohnomasi qaytariladi.
Bosh boshqarma vakillari qayd etishicha, haydovchilik guvohnomasini qayta tiklash tartibi oddiy yo‘qotish holatlaridan keskin farq qiladi. Hujjat yo‘qolgan taqdirda imtihonlarni qayta topshirish shart emas.
Bunday vaziyatda haydovchi tegishli idoralarga murojaat qilib, zarur hujjatlarni taqdim etishi va davlat bojini to‘lashi kifoya qiladi.
