O‘zbekistonda yo‘l harakati xavfsizligini oshirish bo‘yicha chora-tadbirlar kuchaytiriladi. Bu haqida Upl.uz xabar berdi.
O‘zbekiston Respublikasi Prezidenti Shavkat Mirziyoyev raisligida o‘tkazilgan yig‘ilishda yangi haydovchilar tayyorlash tizimi allaqachon ijobiy natijalar berayotgani ta’kidlandi. Xususan, yil boshidan beri kam tajribali haydovchilar tomonidan sodir etilgan qoidabuzarliklar soni 15 foizga kamaygan, og‘ir yo‘l-transport hodisalari esa 30 foizga qisqargan.
Shunga qaramay, ayniqsa yoshlar orasida piyodalar madaniyatini oshirish masalasi hanuz dolzarb bo‘lib qolmoqda. Shu munosabat bilan quyidagi vazifalar belgilandi: yangi o‘quv yili boshlanishidan oldin maktablar va bog‘chalarda yo‘l harakati xavfsizligi bo‘yicha dasturlar to‘liq yangilanadi; maktab o‘quvchilari va yoshlari o‘rtasida “Yashil chiroq” ko‘rik-tanlovi qayta tiklanadi, respublika bosqichining g‘oliblari Prezident sovg‘alari bilan taqdirlanadi; yo‘l harakati qoidalari bo‘yicha oddiy tushuntiruvchi videoroliklar va animatsiyalar ishlab chiqiladi; mahallalarda va ommaviy tadbirlarda yo‘l harakati madaniyati bo‘yicha targ‘ibot ishlari tashkil etiladi.
Yig‘ilishda shuningdek, hududiy rahbarlar hamda tegishli vazirlik va idoralar vakillarining hisobotlari tinglandi. Ushbu chora-tadbirlar yo‘l harakati xavfsizligini yanada mustahkamlashga xizmat qiladi.
