O‘zbekistonda avtomobillarni jarima maydonchasidan qaytarish jarayonini soddalashtiruvchi elektron xizmat joriy etilishi rejalashtirilmoqda. Bu haqida Upl.uz xabar berdi.
Endilikda ruxsatnoma olish onlayn tarzda amalga oshiriladi va bu orqali byurokratik to‘siqlardan qutulish mumkin bo‘ladi. Vazirlar Mahkamasi tomonidan tegishli qaror loyihasi allaqachon e’lon qilingan.
Kutilishicha, 2025 yil 31 iyulgacha ushbu xizmat bir nechta kanallar orqali taqdim etiladi. Jumladan, yagona davlat interaktiv xizmatlari portali, davlat xizmatlari markazlari hamda Yo‘l harakati xavfsizligi xizmati mobil ilovasi orqali foydalanish mumkin bo‘ladi.
Shu bilan birga, jismoniy va yuridik shaxslar an’anaviy usulda, ya’ni og‘zaki yoki yozma shaklda murojaat qilish imkoniyatini saqlab qoladilar. Ushbu yangilikni muvaffaqiyatli amalga oshirish maqsadida, 2025 yil 20 iyulgacha Ichki ishlar vazirligi va Raqamli texnologiyalar vazirligi barcha zarur axborot tizimlarini integratsiyalashni yakunlaydi.
Shuningdek, arizalarni taqdim etish va ko‘rib chiqish tartibini batafsil belgilovchi ma’muriy reglament tasdiqlanadi. Bu esa xizmat ko‘rsatish sifatini oshirishga xizmat qiladi.
👍 0❤️ 0😂 0😢 0😡 0
