Rossiya hujum qilinmaydigan energetika obyektlarini ma’lum qildi

Rossiya hukumati Ukraina bilan Amerika Qo‘shma Shtatlarining vositachiligida erishilgan kelishuvda zarba berish taqiqlangan energetika obyektlari ro‘yxatini taqdim etdi. Bu hujjat 25 mart, seshanba kuni Kreml saytida e’lon qilindi.

Neftni qayta ishlash zavodlari, AES, GESga zarba berish taqiqlanadi

Hujjatda aytilishicha, ro‘yxat Rossiya va Amerika tomonlari o‘rtasida kelishilgan. Ammo bu AQSH yoki Ukraina tomonidan tasdiqlanmagan.

Ro‘yxatga atom elektr stansiyalari, gidroelektrostansiyalar, neftni qayta ishlash zavodlari, neft va gaz quvurlari, saqlash va nasos stansiyalari, elektr stansiyalari, nimstansiyalar, transformator va tarqatuvchilar, elektr energiyasi ishlab chiqarish va uzatish infratuzilmasi kiradi.

Kremlning ta’kidlashicha, ularni o‘qqa tutishga moratoriy 18 martdan boshlab 30 kunga amal qiladi va u uzaytirilishi mumkin. «Tomonlardan biri tomonidan moratoriy buzilgan taqdirda, ikkinchi tomon o‘zini unga rioya qilish majburiyatlaridan ozod deb hisoblashga haqli», — deya ogohlantirdi Rossiya rasmiylari.

Zelenskiy: Rossiya kelishuv shartlarini buzib ko‘rsatmoqda

25 mart kuni Volodimir Zelenskiy Kremlni Qora dengizda o‘t ochishni to‘xtatish va energetika infratuzilmasini o‘qqa tutishni taqiqlash kelishuvlari shartlarini buzib ko‘rsatganlikda aybladi. «Ruslar allaqachon manipulyatsiya qilishni boshladi. Ular kelishuvlarni buzib, bizning vositachilarimizni ham, butun dunyoni ham aldashga harakat qilmoqda», — dedi Ukraina prezidenti.

Oq uyning 25 mart kuni Ar-Riyoddagi muzokaralar yakunlari bo‘yicha bayonotida aytilishicha, Vashington Moskva va Kiyev bilan «Rossiya va Ukrainadagi energetika obyektlariga zarba berishni taqiqlash bo‘yicha kelishuvni amalga oshirish choralarini ishlab chiqishga» kelishib olgan.

Urishayotgan ikki davlat rasmiylari ham xuddi shunday bayonotlar bilan chiqdi. Ammo faqat Moskva shartnomaning amal qilish muddati boshini 18 mart deb atagan va kelishuvni uzaytirish yoki bekor qilish imkoniyatini ham bildirgan.