Tolibon Afg‘onistonda smartfonlardan foydalanishni taqiqlamoqchi
Afg‘onistonda “Tolibon” rahbari Mulla Haybatulloh Oxundzoda smartfonlardan foydalanishni taqiqlashni taklif qildi. Bu haqda Zamin.uz xabar berdi.
Ushbu taklif internet uzilishidan oldin ilgari surilgan. Taxminan bir yil oldin Qandahorda bo‘lib o‘tgan “Tolibon” ulamolar kengashida Oxundzoda smartfonlarga diniy asosda taqiq joriy etishni so‘ragan.
Unga ko‘ra, bu chora salbiy fikrlar va tanqidlarga chek qo‘yish hamda “Tolibon”ning obro‘sini saqlashga xizmat qiladi. Biroq ko‘plab ulamolar bunga qarshi chiqdilar.
Ular smartfonlar va mobil texnologiyalarga katta mablag‘lar sarflanganini, shuningdek, ular kundalik hayot, savdo va ta’limda muhim vosita ekanini ta’kidladilar. Smartfonlar fuqarolarga erkin fikr bildirish va tezkor ma’lumot olish imkonini beradi.
Shundan so‘ng, “Tolibon” internetni uzishga qaror qildi va shu yo‘l bilan aholi global tarmoqlarga kirishini cheklamoqchi bo‘ldi. Qandahordagi mutaxassislar va vazirlar bu qarorning iqtisodiy va ijtimoiy zararlarini ogohlantirdilar.
Ular axborot erkinligini cheklash mamlakat iqtisodiyoti, ta’limi va savdosining rivojlanishiga to‘sqinlik qilishi mumkinligini aytdilar. Ammo Oxundzoda ularning fikrlarini inobatga olmagan va internet uzilishining davom ettirilishini buyurgan.
Shuningdek, hukumat organlari va diplomatik vakolatxonalar uchun alohida internet provayderi tashkil etilishi haqida qaror qabul qilingan. Tahlilchilar fikricha, bu qaror yangi tartibni joriy etish orqali hokimiyatga yaqin shaxslarning iqtisodiy manfaatlarini ta’minlash va axborot oqimini cheklashga xizmat qiladi.
Mutaxassislar ushbu siyosat Afg‘oniston hayotining barcha sohalariga salbiy ta’sir ko‘rsatishini ta’kidlamoqda. Internet cheklovlari so‘z erkinligi bilan birga ta’lim, savdo, sog‘liqni saqlash va xalqaro aloqalarga ham salbiy ta’sir qiladi.
Afg‘onistondagi internet uzilishi va smartfonlardan foydalanish taqiqi mamlakat barqarorligi va rivojlanishiga jiddiy tahdid soladi. “Tolibon” rahbariyatining bu siyosati yosh avlodning bilim olish imkoniyatlarini cheklab qolish bilan birga mamlakatning global iqtisodiy aloqalarini ham zaiflashtirishi kutilmoqda.
Shunday qilib, axborot va kommunikatsiya sohasidagi ushbu cheklovlar uzoq muddatda mamlakatning ijtimoiy va iqtisodiy taraqqiyotiga salbiy ta’sir ko‘rsatadi.
