Rossiya faqat rus tilidagi guvohnomalarni tan oladi
Rossiya hukumati faqat rus tili rasmiy til sifatida tan olingan davlatlarda berilgan haydovchilik guvohnomalarini tan olishini ma’lum qildi. Bu haqda Zamin.uz xabar berdi.
Bu haqda Rossiya Davlat Dumasi raisi Vyacheslav Volodin bayonot berdi. Uning so‘zlariga ko‘ra, agar biror davlatda rus tili rasmiy til sifatida tan olinmagan bo‘lsa, o‘sha davlat fuqarolari Rossiyada haydovchilik guvohnomasi olish uchun imtihon topshirishlari talab etiladi.
Volodinning ta’kidlashicha, rus tilini bilish chet el haydovchilik guvohnomalarini tan olishning asosiy sharti hisoblanadi. Shuningdek, Rossiyaning yo‘l harakati to‘g‘risidagi qonunida belgilanishicha, chet elda berilgan haydovchilik guvohnomalari faqat rus tiliga notarial tasdiqlangan tarjimasi mavjud bo‘lsa yoki guvohnomadagi yozuvlar to‘g‘ridan-to‘g‘ri rus tilida bo‘lsa, amal qiladi.
Qayd etish joizki, O‘zbekistonda beriladigan haydovchilik guvohnomalari rus va ingliz tillariga tarjima qilinadi. Bu esa o‘zbekistonlik haydovchilar uchun muayyan qulayliklar yaratadi.
