Disney Yaqin Sharqda ilk bor «Disneylend» ochadi: BAA turizm markaziga aylanmoqda!
Jahonga mashhur bo‘lgan Disney kompaniyasi o‘zining navbatdagi yirik loyihasi bilan butun dunyo e’tiborini yana bir bor o‘ziga qaratmoqda. Endi mashhur «Disneylend» ilk bor Yaqin Sharq mintaqasida quriladi va uning manzili sifatida Birlashgan Arab Amirliklari poytaxti Abu-Dabi shahri tanlandi. Bu haqda Disney matbuot xizmati xabar berdi.
Disney vakillarining ma’lum qilishicha, yangi tematik park Abu-Dabidagi mashhur sayyohlik markazi sanalgan Yas sun’iy orolida quriladi. Hozircha loyiha bilan bog‘liq barcha tafsilotlar sir saqlanmoqda, biroq parkni yaratish ishlari taxminan ikki yil davom etishi, uni to‘liq qurib bitkazish uchun esa olti yil vaqt kerak bo‘lishi ma’lum qilindi.
«Abu-Dabidagi «Disneylend» haqiqiy Disney muhitini yaratadi va ayni vaqtda ushbu hududga xos milliy xususiyatlarni ham o‘zida aks ettiradi. U dunyo markazlaridan biri hisoblangan BAAda Disneyning o‘ziga xos o‘yin-kulgi oazisiga aylanadi», — dedi The Walt Disney Company bosh direktori Robert Ayger.
Qayd etilishicha, BAAning yangi «Disneylend» qurilishi uchun tanlanishi bejiz emas. Mamlakatda dunyodagi eng yirik aviatsiya xabi mavjud va shuning hisobiga BAAga sayyohlar oqimi tobora ortib bormoqda. Yer yuzining uchdan bir qismi uchun BAAga sayohat qilish uchun o‘rtacha 4 soat vaqt kifoya — bu esa ushbu davlatni sayyohlik nuqtayi nazaridan juda qulay va istiqbolli hududga aylantirgan.
Disney kompaniyasining bu loyihasi nafaqat Arab Amirliklari uchun, balki butun Yaqin Sharq mintaqasi uchun ham turizm sohasida muhim burilish yasashi kutilmoqda. Dunyodagi eng yirik va mashhur ko‘ngilochar maskanlaridan biri bo‘lgan «Disneylend»ning ochilishi mamlakatning turizm salohiyatini yanada oshirishi va dunyoga mashhur turistik manzillar qatoriga qo‘shilishiga xizmat qiladi.
Ma’lumot uchun, hozirgi vaqtda dunyo bo‘ylab jami oltita «Disneylend» mavjud. Ular AQSHning Kaliforniya va Florida shtatlarida, Yaponiyaning Tokio shahri yaqinidagi Urayasuda, shuningdek, Shanxay, Hongkong va Parij kabi shaharlarda joylashgan. BAAda quriladigan yangi bog‘ yettinchi «Disneylend» sifatida tarixga kiradi va mintaqa uchun katta iqtisodiy hamda madaniy ahamiyatga ega bo‘ladi.
Disney ushbu loyihani amalga oshirish orqali nafaqat o‘zining global pozitsiyasini mustahkamlaydi, balki mintaqada oilaviy turizmni ham rivojlantirishga katta hissa qo‘shadi. Buning natijasida har yili millionlab sayyohlar Abu-Dabiga tashrif buyurib, mamlakat iqtisodiyoti uchun yangi imkoniyatlar ochadi.
Disney kompaniyasining yangi mega-loyihasi BAAning kelajakda dunyo miqyosidagi yirik turizm markazlaridan biriga aylanishiga zamin yaratadigan muhim voqelik bo‘ladi.
