Hujumchi Markus Reshford faoliyatini Ispaniyada davom ettirishi kutilmoqda. Bu haqida Euro-football.ru xabar berdi.
Ijtimoiy tarmoqlarda taniqli insayder Fabrizio Romano ma’lum qilishicha, shanba kuni oxirigacha Reshfordning ijaraga berilishi va sotib olish huquqi bilan shartnomasi yakuniy kelishiladi. Tomonlar og‘zaki ravishda allaqachon kelishib olgan.
Shartnoma rasmiy ravishda tasdiqlangach, "Manchester Yunayted" klubi 27 yoshli futbolchining Ispaniyaga ketishiga ruxsat beradi. Yaqin kunlarda Markus "Barselona" klubi uchun tibbiy ko‘rikdan o‘tadi.
So‘nggi paytlarda Markus Reshford "Manchester Yunayted" asosiy jamoasidan alohida mashg‘ulot o‘tkazmoqda, chunki bosh murabbiy Ruben Amorimning rejasida u yo‘q. Shu sababli futbolchi yangi jamoasida faoliyatini davom ettirishga tayyorlanmoqda.
Bu o‘zgarish uning kelajagi uchun muhim qadam hisoblanadi.
