«Benfika» jamoasi yarim himoyachi Richard Riosning transferi bo‘yicha «Palmeiras» klubi bilan muzokaralar olib bormoqda. Bu haqida Euro-football.ru xabar berdi.
Lissabonlik klub kolumbiyalik futbolchi uchun 30 million yevro taklif qilganligi haqida ishonchli manbalar xabar bermoqda. 25 yoshli futbolchiga 2029/30 yilgi mavsum oxirigacha amal qiladigan shartnoma taklif etilmoqda, yillik maoshi esa 3 million yevroni tashkil etadi.
Agar ushbu kelishuv amalga oshsa, Rios «Benfika» tarixidagi eng qimmat uchinchi futbolchi bo‘ladi. U Enzo Fernandez (44,2 million yevro, «River Pleyt») va Darvin Nunes (34 million yevro, «Almeriya»)dan keyin keladi.
Avvaliga «Palmeiras» yulduzi uchun asosiy nomzod sifatida Italiya klubi «Roma» ko‘rsatilgan edi. Ular futbolchi bilan deyarli kelishuvga erishgan, biroq braziliyalik klubni ishontira olmagan.
Hozirda «Benfika» va «Palmeiras» o‘rtasidagi muzokaralar davom etmoqda. Futbolchi va klublar o‘rtasida yakuniy kelishuv amalga oshishi kutilmoqda.
