Saudiya Arabistonidan bo‘lgan jurnalist Abdulaziz Al-Useymi ma’lum qilishicha, Krishtianu Ronaldu o‘zi to‘p surayotgan jamoaning 20 foiz ulushiga egalik qiladi. Bu haqida Euro-football.ru xabar berdi.
Mahalliy ommaviy axborot vositalari bu xabarni tezda yoritib, portugaliyalik futbolchi endilikda nafaqat futbolchi va sardor, balki klub egasi ham bo‘lganini ta’kidladilar. Avvalroq, iyun oyida Ronauldu klub bilan yangi shartnoma tuzgani haqida xabar berilgandi.
Ushbu yangi kelishuvga ko‘ra, unga 15 foiz ulush ajratilgani aytilgan edi. Yangi ma’lumotlarga ko‘ra, bu ulush 20 foizga yetgan.
2024-2025 yilgi mavsumda 40 yoshli Krishtianu Ronaldu jami 41 o‘yinda maydonga tushib, 35 ta gol urgan va to‘rt bora sheriklariga golli uzatma bergan. Hozirda futbolchining transfer narxi 12 million yevroga baholanmoqda.
Shu tariqa, Ronaldu klubdagi faoliyati va natijalari bilan bir qatorda uning boshqaruvida ham faol ishtirok etmoqda. Bu holat klub uchun ham, futbolchi uchun ham muhim voqea bo‘ldi.
