Moskvadagi “Dinamo” jamoasining sobiq hujumchisi va Rossiyaning bir necha klublarini boshqargan tajribali mutaxassis Sergey Kiryakov “Beshiktosh” tarkibidan “Spartak” klubiga o‘tgan yarim himoyachi Jhedson Fernandesning transferi yuzasidan o‘z fikrini bildirdi. Bu haqida Euro-football.ru xabar berdi.
Rasmiy ma’lumotlarga ko‘ra, ushbu kelishuvning umumiy qiymati 20 million yevro va qo‘shimcha 5 million yevro bonus sifatida ko‘rsatilgan. Biroq ayrim ommaviy axborot vositalari “Spartak” yangi futbolchi uchun jami 27 million yevro sarflagani haqida xabar bermoqda.
Kiriyakovning so‘zlariga ko‘ra, Jhedson uchun 27 million yevro to‘lash to‘g‘ri qaror bo‘lganmi yoki yo‘qmi, buni vaqt ko‘rsatadi. U “Spartak” klubi faoliyatida futbolchilarni tanlash va ularning narxlari borasida savollar ko‘payayotganini ta’kidladi.
Mutaxassisning fikricha, klub sport menejmentida muammolar mavjud, chunki ba’zi futbolchilar klub oldiga qo‘yilgan vazifalarga mos kelmayapti. Shuningdek, Sergey Kiryakov bu holatda asosiy mas’uliyat klubning sport direktori Fransis Kahigao zimmasiga tushishini qayd etdi.
Avvalroq, “Spartak” rahbariyati Fransis Kahigaoning faoliyatini baholashni yozgi transfer oynasi, ya’ni 1 sentyabrdan so‘ng amalga oshirishini bildirgandi.
