Tajribali yarim himoyachi Jeyms Milner o‘zining maydondagi raqamini o‘zgartirganini ma’lum qildi. Bu haqida Euro-football.ru xabar berdi.
Endilikda u Angliyaning «Brayton» jamoasida 20-raqam ostida harakat qiladi. Bu qaror Milnerning sobiq jamoadoshi Diogu Jotaga hurmat ramzi sifatida qabul qilindi.
Jeyms Milner ilgari «Liverpul» klubida Diogu Jota bilan birga to‘p surgan va u bilan yaxshi do‘st bo‘lgan. Milnerning aytishicha, 20-raqamni tanlashi orqali u Jotaga bo‘lgan hurmatini ifoda etmoqchi.
Jeyms Milner o‘z intervyusida shunday dedi: “Men 20-raqamni olishni istadim. Bu bilan Diogu Jotaga hurmatimni bildiraman.
U ajoyib futbolchi va yaxshi inson edi. Uning raqamini Angliya Premer-ligasida kiyish men uchun katta sharaf bo‘ladi.” Avvalroq Milner «Brayton» safida 6-raqam ostida maydonga tushgan edi.
Eslatib o‘tamiz, Diogu Jota 3-iyul kuni Ispaniyada yuz bergan yo‘l transport hodisasida o‘zining ukasi Andre bilan birga vafot etgan. Ushbu fojiali voqeadan so‘ng, «Liverpul» klubi Jotaning 20-raqamini abadiy saqlashga qaror qilgan.
