Nuri Shaxin “Beshiktosh” bosh murabbiyligiga nomzod bo‘ldi

Dortmundning “Borussiya” jamoasining sobiq bosh murabbiyi Nuri Shaxin yangi klub e’tiboriga tushgan. Bu haqida Euro-football.ru xabar berdi.

Turkiyalik mutaxassis o‘tgan mavsum boshida “Borussiya” jamoasini boshqargan edi, biroq joriy yilning yanvar oyida lavozimidan ozod etilgan. Shundan so‘ng, 36 yoshli murabbiy hali boshqa jamoa bilan shartnoma imzolamagan.

Ammo yaqin orada u yana ish boshlashi mumkin. Mashhur jurnalist Fabrizio Romano bergan ma’lumotga ko‘ra, Nuri Shaxin “Beshiktosh” klubi bosh murabbiyligiga nomzodlar ro‘yxatining yuqori qismida turibdi.

Hozirda klub rahbariyati norvegiyalik murabbiy Ule Gunnar Sulshyer bilan hamkorlikni tugatishni va uning o‘rniga mahalliy mutaxassisni taklif etishni ko‘rib chiqmoqda. Eslatib o‘tamiz, Nuri Shaxin bungacha ham Turkiyada ishlagan.

U Dortmundga qaytishidan avval “Antalyaspor” jamoasida bosh murabbiy lavozimida faoliyat yuritgan. “Beshiktosh” jamoasi o‘tgan mavsum Turkiya chempionatida to‘rtinchi o‘rinni egallagan.

Klub hozirda natijalarni yaxshilash uchun yangi bosh murabbiy izlashni boshlagan.