Sobiq mashhur futbolchi Andrey Kanchelskis Moskvaning "Spartak" jamoasi bosh murabbiyi Dejan Stankovich haqida o‘z fikrini bildirdi. Bu haqida Euro-football.ru xabar berdi.
Kanchelskisning ta’kidlashicha, hozirda serbiyalik mutaxassisni klubdan bo‘shatish masalasi dolzarb emas. Uning aytishicha, agar Stankovichni lavozimidan ozod qilish kerak bo‘lganida, bu qaror o‘tgan mavsum yakunida qabul qilinishi lozim edi.
Kanchelskisning fikriga ko‘ra, Stankovich ketgan taqdirda ham jamoada jiddiy o‘zgarish bo‘lmaydi. Shu sababli unga ishlash uchun imkon berish kerak.
Kanchelskis, shuningdek, "Spartak" jamoasi hatto tajribali murabbiylar boshchiligida ham bu mavsumda yutuqlarga erisha olmasligini ta’kidladi. Uning so‘zlariga ko‘ra, mashhur mutaxassislar, jumladan, Raneri yoki Fergyuson kelgan taqdirda ham "qizil-oqlar" natija ko‘rsata olmaydi.
Shuning uchun Stankovich hozircha ishini davom ettirishi maqsadga muvofiq. Ma’lumot uchun, Dejan Stankovich boshchiligida "Spartak" Rossiya chempionatining dastlabki uch uchrashuvida to‘rt ochko jamg‘ardi.
Jamoa "Dinamo" ustidan g‘alaba qozondi, "Baltika"ga yutqazdi va "Akron" bilan durang o‘ynadi. Keyingi turda "Spartak" chempionat peshqadami "Lokomotiv"ga qarshi maydonga tushadi.
Eslatib o‘tamiz, o‘tgan mavsum yakunida "Spartak" Dejan Stankovich bilan shartnomasini 2027 yil o‘rtasiga qadar uzaytirgan edi.
