“Barselona” va “Vilyarreal” o‘yini AQSHda o‘tishi mumkin

Ispaniya futbol chempionati – La Liga rahbari Xavyer Tebas chempionat o‘yinini AQSHda o‘tkazishni uzoq vaqtdan beri rejalashtirib kelmoqda. Bu haqida Euro-football.ru xabar berdi.

Sport nashrining xabar berishicha, bu tashabbus amalga oshish sari muhim qadam tashladi. Ma’lumotlarga ko‘ra, “Vilyarreal” va “Barselona” jamoalari o‘rtasidagi La Liga uchrashuvi AQSHda o‘tkazilishi mumkin.

Gap Ispaniya chempionatining 17-turi doirasidagi o‘yinga borib taqaladi. Ushbu tur uchun asosiy sana 21-dekabr etib belgilangan.

Bu davrda Chempionlar Ligasi o‘yinlari bo‘lmagani sababli, uchrashuvni chet elda o‘tkazish uchun qulay imkoniyat yaratiladi. Shuningdek, “Vilyarreal” ham Chempionlar Ligasi yo‘llanmasini qo‘lga kiritgani bois, bu o‘yin yuqori darajadagi uchrashuv sifatida e’tiborga loyiq.

Hozirda Ispaniya futbolining yuqori lavozimli vakillari ushbu masalani muhokama qilishda davom etmoqda. La Liga tarixida birinchi marta chempionat o‘yinini Ispaniyadan tashqarida o‘tkazish uchun hali yetarli vaqt bor.

Tashkilotchilar barcha tafsilotlarni kelishib olishlari va yuqori saviyada o‘yin tashkil etishlari zarur.