Chelsi Xavi Simons transferiga Nkunkuni ham qo‘shishi mumkin
“Chelsi” va “RB Leyptsig” klublari hujumkor yarim himoyachi Xavi Simonsning transferi borasida muzokaralarni davom ettirmoqda. Bu haqida Euro-football.ru xabar berdi.
Avvalroq, ushbu o‘tish deyarli yakunlangan deb hisoblangandi, biroq hozircha tomonlar barcha shartlarni to‘liq kelishib olmagan. The Guardian nashrining xabariga ko‘ra, muzokaralarni yengillashtirish maqsadida “Chelsi” o‘z hujumchisi Kristofer Nkunkuni ham kelishuvga qo‘shishga tayyor.
Ma’lumot uchun, Nkunku Angliyaga ko‘chib o‘tishidan avval aynan “RB Leyptsig” safida o‘ynagan va yaxshi natijalar ko‘rsatgan. Xavi Simons “Chelsi” klubi bilan shaxsiy shartnoma borasida kelishuvga erishgan va hozirda ikki klub transferni rasman yakunlashini kutmoqda.
Transfermarkt portali 22 yoshli niderlandiyalik futbolchining qiymatini 70 million yevroga baholagan. Bu esa Nkunku narxidan ikki barobar ko‘p.
Muzokaralar davom etayotgan bo‘lib, tomonlar yaqin kunlarda barcha masalalarni hal etishi kutilmoqda. Shu tariqa, Xavi Simonsning “Chelsi”ga o‘tishi bo‘yicha rasmiy xabar tez orada e’lon qilinishi mumkin.
