Yamal yozda kuchayib, Barselonada porlay boshladi

"Barselona" klubi hujumchisi Lamin Yamal o‘zining kattalar futbolidagi uchinchi to‘liq mavsumiga tayyorgarlik ko‘rmoqda. Bu haqida Euro-football.ru xabar berdi.

18 yoshli futbolchi mavsumoldi o‘yinlarida o‘zini yaxshi ko‘rsatdi. U to‘rtta uchrashuvda to‘rt marta raqib darvozasini ishg‘ol qildi va bir marta hamjamoadoshiga golli pas berdi.

Yakshanba kuni bo‘lib o‘tgan Joаn Gamper Kubogi finalida "Komo" jamoasiga qarshi o‘yinda Yamal ikkita gol urdi va jamoasining yirik hisobdagi g‘alabasiga o‘z hissasini qo‘shdi. Ispaniyaning mashhur Sport nashri jurnalistlari fikriga ko‘ra, Yamal o‘tgan mavsumga nisbatan yanada yaxshi o‘ynay boshlagan.

Nashr muxbirlari uning tezligi, jismoniy kuchi va maydondagi harakatlarining ancha samarali bo‘lib borayotganini ta’kidlamoqda. U hujumlarni aniq yakunlay olishi, maydondagi harakatlari va jamoaga foyda keltirishi bilan ajralib turmoqda.

2024/2025 yilgi mavsumda Lamin Yamal "Barselona" bosh murabbiyi Hans-Diter Flik qo‘l ostida jami 55 o‘yinda maydonga tushib, 18 ta gol va 25 ta golli uzatma amalga oshirdi. Bu natijalar yosh futbolchining kelajagi porloq ekanidan dalolat beradi.

Yamalning o‘yinlari nafaqat murabbiylar, balki futbol ishqibozlari tomonidan ham yuqori baholanmoqda.