Saudiya Arabistoni chempionati klublaridan biri Madridning Real jamoasida to‘p surayotgan Kilian Mbappeni o‘z safiga qo‘shib olish niyatida. Bu haqida Euro-football.ru xabar berdi.
Mazkur klub fransiyalik hujumchini sotib olish uchun juda katta miqdorda mablag‘ taklif qilgan. Manbaga ko‘ra, saudiyalik klub Real rahbariyatiga 350 million yevro miqdorida rekord taklif bilan murojaat qilgan.
Biroq, Real prezidenti Florentino Peres bu taklifga rozilik bermagan va Mbappeni sotishga hozircha tayyor emasligini bildirgan. Ma’lumotlarga ko‘ra, Kilian Mbappe o‘zi ham Saudiya Arabistonida faoliyatini davom ettirishni xohlamaydi.
U Real safida o‘ynashni afzal ko‘radi. O‘tgan mavsumda Mbappe Madrid jamoasi tarkibida jami 59 o‘yinda maydonga tushib, 44 ta gol urishga erishgan va 5 ta golli uzatmani amalga oshirgan.
Fransiyalik hujumchining Real klubi bilan tuzgan shartnomasi 2029 yil yozigacha amal qiladi. Shu sababli, klub rahbariyati va futbolchining o‘zi hozircha Saudiya Arabistoniga o‘tish borasida hech qanday qarorga kelmagan.
