"Liverpul" futbol klubi Italiyaning "Parma" jamoasida markaziy himoyachi sifatida to‘p surayotgan 18 yoshli Jovanni Leoni bilan shartnoma imzolash arafasida turibdi. Bu haqida Euro-football.ru xabar berdi.
Yosh futbolchi Angliyaning mashhur jamoasiga o‘tishga rozi bo‘ldi, klub vakillari esa kelishuv shartlari bo‘yicha yakuniy muzokaralar olib bormoqda. Tez orada tomonlar barcha masalalarda kelishuvga erishishlari kutilmoqda.
Italiyaning taniqli sobiq murabbiyi Arrigo Sakki ham Leoni Angliyaga ko‘chib o‘tishini ijobiy baholadi. U o‘z fikrida quyidagilarni ta’kidladi: "Ishonchim komilki, Leoni kelajakda Italiya terma jamoasi himoyasining asosiy tayanchiga aylanadi.
Ba’zi odamlar uning "Liverpul"ga o‘tishi bo‘yicha shubha bildirayotgan bo‘lsa-da, men bunga asos ko‘rmayman. U Italiya chempionatida atigi 17 ta o‘yin o‘tkazgan bo‘lsa ham, bu yetarli.
Chunki shu o‘yinlarda u zarur bo‘lgan sifatlarini to‘liq namoyon qildi. Futbolchining iste’dodi darhol ko‘zga tashlanadi.
Ba’zilar chempionatda yuzlab o‘yinlarda maydonga tushishi mumkin, biroq Leoni o‘zining ilk mavsumidayoq yuqori darajadagi mahoratini ko‘rsata oldi. Iste’dod yoshga bog‘liq emas", – deya fikr bildirdi Arrigo Sakki.
