“Zenit” va Moskvaning “Spartak” jamoalarida to‘p surgan sobiq futbolchi Vladimir Bystrov “Spartak”ning Dejan Stankovich boshchiligidagi natijalariga o‘z munosabatini bildirdi. Bu haqida Euro-football.ru xabar berdi.
Hozirda “Spartak” Rossiya chempionatining to‘rt turidan so‘ng atigi bir marta g‘alaba qozongan va turnir jadvalida o‘n birinchi o‘rinda bormoqda. Vladimir Bystrovning fikricha, bunday murabbiy “Spartak”da ishlamasligi kerak.
U murabbiy qat’iyatli, mas’uliyatni o‘z zimmasiga ola oladigan va futbolchilarga o‘z kuchi bilan namuna bo‘la oladigan inson bo‘lishi zarur, deya ta’kidladi. Mutaxassis murabbiy jamoa oldida hech qanday zaiflik ko‘rsatmasligi kerakligini, futbolchilar o‘z murabbiylaridan shubhalanmasliklari muhimligini qayd etdi.
Bystrov serbiyalik mutaxassisni ko‘proq tashqi ko‘rinishga va omma oldida o‘zini ko‘rsatishga urinishda aybladi. U Stankovichning hakamlar bilan ko‘p bahslashishini, matbuotda hakamlar jamoaning ochkolarini olib qo‘yayotgani haqida gapirishini misol sifatida keltirdi.
Avvalroq “Spartak” rahbariyati Stankovichni iste’foga chiqarish masalasini ko‘rib chiqayotgani, uning o‘rniga “Krasnodar”da ishlagan yana bir serbiyalik mutaxassis Vladimir Ivich asosiy nomzod sifatida ko‘rilayotgani haqida xabarlar tarqalgan edi.
