Sobiq futbolchi Igor Semshov Moskva "Dinamo" jamoasining Rossiya chempionatining joriy mavsumidagi yomon natijalari sabablarini izohladi. Bu haqida Euro-football.ru xabar berdi.
Valeriy Karpinning shogirdlari to‘rt o‘yinda atigi besh ochko jamg‘arishgan. Hozirda moskvaliklar turnir jadvalida to‘qqizinchi o‘rinda turibdi.
Semshovning aytishicha, bunday natijalar uchta asosiy omil bilan bog‘liq. Birinchi sabab – jamoada ko‘plab jarohatlar mavjudligi.
Ikkinchisi – Karpin tomonidan tashkil etilgan murakkab mashg‘ulot jarayoni va o‘yin uslubi bo‘lib, uni butun jamoa to‘liq anglab yetishi uchun vaqt kerak. Uchinchi omil esa jamoada yangi o‘yinchilarning ko‘pligi bilan izohlanadi.
Keyingi turda "Dinamo" Moskva derbisida CSKA jamoasi bilan bellashadi. Uchrashuv 17 avgust kuni "VTB Arena" stadionida soat 18:00 da boshlanadi.
