Elit Osiyo Chempionlar Ligasi: Roberto Firmino musobaqaning eng yaxshi futbolchisi deb topildi
Osiyo futbol konfederatsiyasi (OFK) Elit Osiyo Chempionlar Ligasining yakunlanishidan so‘ng musobaqada eng yaxshi harakat qilgan futbolchilar nomini e’lon qildi.
Eng yaxshi darvozabon sifatida Saudiya Arabistonining «Al Ahli» klubi posboni Eduard Mendi tan olindi. U musobaqa davomida ishonchli o‘yin namoyish etib, o‘z klubining finalgacha bo‘lgan yo‘lida muhim rol o‘ynadi.
Eng yaxshi to‘purar unvoni «Al Hilol» jamoasining hujumkori Salim Al Dovsarining hissasiga tushdi. Saudiyalik forvard Elit OCHL musobaqasida eng ko‘p gol urib, jamoasining yarim finalgacha yetib borishiga katta hissa qo‘shdi.
Musobaqaning eng yaxshi o‘yinchisi sifatida esa «Al Ahli» klubining tajribali hujumchisi Roberto Firmino e’tirof etildi. Braziliyalik futbolchi final bahsida ikki golga assistentlik qilib, jamoasining bosh sovrinni qo‘lga kiritishida muhim rol o‘ynagan edi.
Eslatib o‘tamiz, «Al Ahli» klubi finalda Yaponiyaning «Kavasaki Frontale» klubini 2:0 hisobida mag‘lub etib, Elit Osiyo Chempionlar Ligasining bosh sovriniga ega chiqqandi.
Shunday qilib, Roberto Firminoning ajoyib o‘yini hamda Saudiya Arabistoni jamoalarining musobaqadagi yuqori natijalari Osiyo futbolidagi yangicha davr boshlanganini yana bir bor isbotladi.
