Muhammad Saloh: «Oltin to‘pni qo‘lga kiritish – eng katta orzuim»
«Liverpul» klubining misrlik yulduzi va sardori Muhammad Saloh dunyoning eng nufuzli futbol mukofoti bo‘lgan «Oltin to‘p»ni qo‘lga kiritish borasida o‘z fikrlari bilan o‘rtoqlashdi. «France Football» nashriga bergan intervyusida tajribali futbolchi faoliyatining qolgan qismini qanday maqsadlarga bag‘ishlashi va ushbu mukofotni qo‘lga kiritish uchun qanday intilishda ekanini ta’kidladi.
Bu mavsumning boshida «Liverpul» bir yo‘la to‘rtta sovrin uchun kurash olib borgan vaqtda, Muhammad Saloh ham «Oltin to‘p» uchun asosiy nomzodlardan biri sifatida ko‘rilgandi. Biroq, jamoa Chempionlar ligasidan chiqib ketganidan keyin, uning individual mukofot uchun imkoniyatlari ancha pasayib qoldi. Shu holatga qaramasdan, Saloh o‘zining orzu-niyatlari haqida samimiy fikr bildirdi:
«Bu mening o‘z qo‘limda emas, lekin men hayotim davomida xalqim va Vatanim uchun «Oltin to‘p»ni qo‘lga kiritishni orzu qilaman. Misrning kichik bir qishlog‘ida katta bo‘lgan bola uchun hatto bunday mukofot haqida orzu qilishning o‘zi qiyin. Faqat «Liverpul»ga o‘tganimdan keyin bu haqda jiddiy o‘ylay boshladim. Ammo agar shu mukofotga erishmasam ham, men o‘z futbolchilik faoliyatimdan mamnun bo‘laman va uning muvaffaqiyatli o‘tganini hisoblayman», – dedi hujumchi.
Shu bilan birga, Saloh o‘zining yoshi bilan bog‘liq holatlarni ham eslatib o‘tdi va hali oldinda ko‘plab imkoniyatlar borligini ta’kidladi:
«Hozir 32 yoshdaman va agar so‘nggi yillardagi «Oltin to‘p» g‘oliblariga qaraydigan bo‘lsak, ularning ko‘pi aynan o‘ttiz yoshdan keyin ushbu mukofotga erishgan. Demak, menda ham shunday imkoniyat mavjud. Keyingi mavsum esa biz uchun yanada qiziqarli va muhim bo‘ladi. «Liverpul» bilan Angliya chempionligi unvonini himoya qilishimiz, Chempionlar ligasida g‘alaba qozonish uchun kurashishimiz lozim. Bundan tashqari, Misr milliy jamoasi bilan Afrika Millatlar Kubogi va Jahon chempionatida ishtirok etamiz. Bu menga o‘zimni yanada yaxshiroq namoyon etish imkoniyatini beradi», – deya qo‘shimcha qildi Saloh.
Qayd etish lozimki, Muhammad Saloh ushbu mavsumda «Liverpul» tarkibida o‘tkazgan 50 ta uchrashuvda raqib darvozasiga 33 ta gol kiritib, jamoadoshlariga 23 ta golli pas berdi. Bu ko‘rsatkichlar bilan u jamoasining asosiy yetakchisi va eng samarali o‘yinchisi ekanini yana bir bor tasdiqladi.
Zamin.uz tahririyati Muhammad Salohga o‘zining orzulariga yetishishida omad va katta muvaffaqiyatlar tilaydi. Muxlislar esa misrlik yulduzning kelgusi mavsumlarda ham futbol maydonidagi ajoyib harakatlaridan zavq olishda davom etadi.
