Angliyaning "Manchester Siti" klubi Germaniyaning mashhur sport kiyimlari ishlab chiqaruvchisi Puma bilan birgalikda 2025/26 yilgi mavsum uchun yangi uy liboslarini rasman taqdim etdi.
Yangi libosning dizaynida klubning an’anaviy och moviy rangi asos qilib olingan bo‘lib, bu safargi formaning eng yorqin jihati – uning ko‘krak qismida joylashgan oq rangdagi diagonal chiziq bo‘ldi. Bu element klubning avvalgi mavsumlardagi safar liboslarida ko‘p uchrar edi, ammo bu yildan boshlab uy libosi dizayniga ham kiritildi.
Formaning yoqasi va yenglaridagi oq rangdagi yengil bezaklar ham dizaynning umumiy ko‘rinishiga o‘ziga xoslik baxsh etmoqda. Orqa qismning yuqori qismida "CITY" degan yozuv mavjud bo‘lib, bu klubning nomini yanada aniq ko‘rsatadi.
Bu yilgi libos maxsus texnologiyalar bilan ishlab chiqilgan. "ULTRAWEAVE" nomli mato o‘yinchilarning maydonda qulay harakatlanishini ta’minlash bilan birga, ularga yengillik va havo o‘tkazuvchanlikni taqdim etadi. Shu bilan birga, kiyimning pastki qismining yon tomonida Pumaning "Authentic Licensed Football" yozuvi va logotipi joylashtirilgan, bu esa mahsulotning originalligini tasdiqlovchi belgidir.
Ma’lum bo‘lishicha, "shaharliklar" yangi formalarini AQSHda bo‘lib o‘tadigan Klublar o‘rtasidagi jahon chempionatida ilk bor kiyib maydonga tushadi. Bu xalqaro musobaqa futbolchilar va muxlislar uchun yangi libosning birinchi sinovi bo‘ladi.
"Manchester Siti" hozirgi kunda Angliya Premer-ligasi turnir jadvalida 4-o‘rinda bormoqda. Jamoa uchun mavsum u qadar muvaffaqiyatli bo‘lmadi, chunki "Liverpul" muddatidan avval chempionlikni qo‘lga kiritdi. Yevropa Chempionlar ligasida ham "shaharliklar" 2012/13 mavsumidan beri birinchi marta 1/8 finalga chiqa olmadi. Shu sababli, yangi mavsumdagi libos jamoa va muxlislar uchun yangi boshlanishlarning ramzi bo‘lishi kutilmoqda.
"Manchester Siti" muxlislari yangi mavsum libosini ijtimoiy tarmoqlarda katta qiziqish bilan kutib olishdi va klubning bu yangi dizayni ular tomonidan ijobiy baholandi.
