Yevropa futbolidagi katta transferlardan biri amalga oshdi. Madridning “Real” klubi Angliyaning mashhur futbolchisi, “Liverpul”ning o‘ng qanot himoyachisi Trent Aleksandr-Arnoldni o‘z tarkibiga qo‘shib olish borasida “qizillar” bilan kelishuvga erishdi. Bu haqda taniqli ispaniyalik jurnalist Ramon Alvares de Mon X ijtimoiy tarmog‘ida ma’lum qildi.
Ma’lumotlarga ko‘ra, mazkur transfer 15 iyun kuni start oladigan Klublar o‘rtasidagi Jahon chempionati boshlanishidan avval amalga oshiriladi. “Qaymoqranglilar” tez orada futbolchini rasman taqdim etishi kutilmoqda.
Manbalar xabar berishicha, “Real” klubi Aleksandr-Arnoldning iyun oyidagi maoshini to‘liq qoplashga rozi bo‘lgan va shu bilan birga “Liverpul” klubiga muayyan miqdorda qo‘shimcha tovon puli to‘lashni ham o‘z zimmasiga olgan.
Trent Aleksandr-Arnold hozirda Yevropaning eng yuqori saviyadagi himoyachilaridan biri sifatida tan olingan. Uning texnik mahorati, golli uzatmalari va standart vaziyatlardagi aniq zarbalari uni jahon darajasidagi o‘yinchiga aylantirgan.
Futbolchining “Liverpul” bilan amaldagi shartnomasi 2025 yilning 30 iyuniga qadar amal qilishi kerak edi. Ammo “Real” rahbariyati transferni avvalroq yakunlash uchun faol harakat qildi va buni amalga oshirishga muvaffaq bo‘ldi. Avvalroq OAVda tarqalgan xabarlarga ko‘ra, shartnomani muddatidan oldin bekor qilgani uchun madridliklar “Liverpul”ga 1–2 million yevro miqdorida kompensatsiya to‘lashi mumkin.
Madrid klubi rahbariyati ushbu transferni jamoaning himoya chizig‘ini mustahkamlashda strategik qadam sifatida baholamoqda. Xabi Alonso boshchiligidagi yangi “Real” yangi mavsumda ham ichki chempionat, ham xalqaro maydonda yuqori natijalar ko‘rsatishni maqsad qilgan. Aleksandr-Arnold esa bu maqsadlarni amalga oshirishda asosiy figuralardan biriga aylanishi mumkin.
Futbol ishqibozlari esa ushbu transferning maydonda qanday natija berajagini va Aleksandr-Arnold “Santyago Bernabeu”da o‘zini qanday ko‘rsatishini katta qiziqish bilan kutmoqda.
Zamin.uz tahririyati esa ushbu voqea rivojini kuzatishda davom etadi va sizga eng so‘nggi ma’lumotlarni taqdim qilib boradi.
