Peres va Alonso yangi yarim himoyachi borasida kelishmayapti

Real Madrid prezidenti Florentino Peres jamoa bosh murabbiyi Xabi Alonso bilan kelishmovchilikka duch kelmoqda. Bu haqida Euro-football.ru xabar berdi.

Ispaniyaning Sport nashriga ko‘ra, klub rahbari va murabbiy yangi yarim himoyachini sotib olish masalasida bir xil fikrda emaslar. Alonso Karlo Anchelottiga o‘xshash bo‘lishni istamaydi.

Yosh murabbiy transferlar bo‘yicha qarorlarga ta’sir o‘tkazishni xohlaydi. U jamoada yangi yarim himoyachini ko‘rishni istaydi va Angelo Shtiller, Nikolo Barella yoki Kes Smit kabi futbolchilarni taklif qilgan.

Ammo bu nomzodlar Peresni ishontira olmadi. Real prezidenti faqat ishonchli o‘yinchini – masalan, Rodrini sotib olishga tayyor.

Shu bilan birga, Peres jamoa tarkibini kuchaytirish zarurligini yaxshi tushunadi. U Klub jahon chempionatida ko‘rilgan natijadan norozi bo‘lib, Real yarim finalda PSJga 0:4 hisobida yutqazganidan keyin bu masalani yanada jiddiy qabul qilmoqda.