Milliarder Ilon Maskning Neuralink startapi navbatdagi operatsiyalar uchun yangi bemorlarni qidirishga kirishdi. Endi bu borada mintaqaviy chegaralar yo‘q — dunyoning istalgan nuqtasidagi voyaga yetgan shaxs navbatdagi ishtirokchiga aylanishi mumkin. Oldin arizalar faqat AQSH, Kanada va Buyuk Britaniya aholisidan qabul qilinardi.
Neuralink'ning dastlabki bemorlari falaj yoki yon amiotrofik sklerozi bo‘lgan odamlar edi, endilikda yangi kasalligi bor ko‘ngillilar qidirilmoqda. Kompaniya tetraplegiyaga (tananing asosiy qismi falajlangan) chalingan insonlarni qidirayotganini ma’lum qildi. Majburiy shart: bemorning orqa miya jarohati sabab ikkala qo‘li ham ishlamasligi kerak.
Arizalarni 2025 yil 2 apreldan boshlab laboratoriyaning rasmiy sayti orqali yuborish mumkin.
Tajriba doirasida chip bosh chanog‘iga joylashtiriladi. Maxsus manipulyator robot yordamida 64 ta ingichka tola kiritiladi, ularda jami 1024 ta elektrod mavjud. Manipulyator robot miyaning harakatga javob beradigan sohalarini birlashtiradi. Har bir tolaning qalinligi 4 mikrometrdan, uzunligi esa 20 millimetrdan oshmaydi. Chipning o‘zini kattaligi esa tangadek keladi.
«Tadqiqot harakatlar uchun javobgar bo‘lgan miya qismiga kichik, tashqi tomondan ko‘zga tashlanmaydigan implant joylashtirishni o‘z ichiga oladi. Ushbu qurilma insonning neyron faolligini tahlil qilib, unga faqat harakat haqida o‘ylash orqali kompyuter yoki smartfonni boshqarish imkoniyatini beradi. Bunda hech qanday simlar yoki jismoniy harakat talab etilmaydi», — deyiladi xabarda.
Eslatib o‘tamiz, 2024 yil yanvar oyida dunyodagi birinchi odamga Neuralink miya implanti o‘rnatilgandi. 29 yoshli Noland Arbo umurtqa pog‘onasi shikastlangan baxtsiz hodisa oqibatida butunlay falaj bo‘lib qolgan. Arbo miyasiga Neuralink chipining o‘rnatilishi natijasida fikr kuchi yordamida kompyuterni boshqara olgan.
