Kompyuter qismlari, xususan DDR5 xotira modullari narxi yaqin orada sezilarli darajada oshishi mumkin, deb pepelac.news yozmoqda. Bunga Samsung kompaniyasining DRAM va NAND mahsulotlari uchun butun dunyo bo‘ylab narxlarni 3–5% ga oshirish qarori sabab bo‘lmoqda.
Koreyaning MK axborot resursiga ko‘ra, bu qarorga yarim o‘tkazgich sohasidagi talab va raqobatchilarning o‘xshash harakatlari turtki bo‘lmoqda. Pandemiyadan so‘ng DRAM sanoati tanazzulga yuz tutgan edi, ammo hozirda talab yana ortmoqda.
DRAMeXchange ma’lumotlariga ko‘ra, DDR5 modullarining narxi 12% gacha oshgan, asosiy talab esa serverlar va sun’iy intellekt tizimlaridan kelib chiqmoqda. NAND xotira narxi esa 9% gacha oshgan.
Narxlar ko‘tarilishining asosiy sababi — AI va data markazlar ehtiyojining keskin ortishi. Samsung va Micron kabi kompaniyalar tomonidan e’lon qilingan narx oshirishlar fonida bu o‘sish davom etishi mumkin. Bu esa oddiy foydalanuvchilar uchun xarajatlarning oshishiga olib keladi.
