Xitoyda uchuvchi avtomobillar ommaviy ishlab chiqariladi
Xitoyning XPeng kompaniyasi 2026-yilda dunyodagi ilk ommaviy uchuvchi avtomobillarni ishlab chiqarishni boshlashni rejalashtirmoqda, deb Xinhua agentligi xabar berdi.
Kompaniya bosh direktori Xe Syaopenning so‘zlariga ko‘ra, XPeng bu rejani Xitoyda past balandlikda parvoz qiluvchi transport vositalari bozorining rivojlanishi va hukumat tomonidan qo‘llab-quvvatlanishi fonida amalga oshirishni mo‘ljallamoqda. Agar barcha ishlar rejalashtirilgan tartibda davom etsa, XPeng dunyoda birinchi bo‘lib uchuvchi avtomobillarni ommaviy ishlab chiqaruvchi kompaniyaga aylanadi.
Xitoyning 2025-yil uchun iqtisodiy va ijtimoiy rivojlanish rejasiga ko‘ra, mamlakatda past balandlikda parvoz qiluvchi transport vositalarining qo‘llanilishini kengaytirish rejalashtirilgan. Shu bilan birga, xavfsizlik choralarini kuchaytirish va xavflarni bartaraf etish bo‘yicha ham ish olib boriladi.
XPeng vakillarining ma’lum qilishicha, 2024-yil oxirida kompaniya uchuvchi avtomobillar ishlab chiqarish zavodining qurilishini 2025-yilning uchinchi choragida yakunlashni rejalashtirgan. Shuningdek, XPeng Aeroht modulli avtomobilining oldindan sotuvlarini 2024-yil oxirida boshlash mo‘ljallanmoqda. Ushbu avtomobil bagajidan uchuvchi qurilma chiqib, ikki kishini havoga ko‘tarish imkoniyatiga ega bo‘ladi.
Mazkur avtomobilning dastlabki narxi 1-2 million yuan (taxminan 138-276 ming AQSh dollari) atrofida bo‘lishi kutilmoqda. Dastlab u Xitoy bozorida sotuvga chiqarilib, keyinchalik xalqaro bozorga ham yetkazilishi rejalashtirilgan. Kompaniya xaridorlarga yetkazib berishni 2025-yilning to‘rtinchi choragida boshlashni maqsad qilgan.
Nodirbek
