Ijtimoiy tarmoqlarda Buxoroda haydovchi piyodalarni yo‘lni kesib o‘tishlariga ruxsat bergan videomaterial tarqaldi. Bu haqida Upl.uz xabar berdi.
Haydovchi yo‘l harakati qoidalariga rioya qilgan bo‘lsa-da, unga favqulodda vaziyat yaratganlik uchun jarima solindi. Ma’lum bo‘lishicha, haydovchi orqasidan kelayotgan mansabdor shaxslarga to‘siq bo‘lgan.
Ular piyodalar yo‘lni kesib o‘tishini kutib, biroz kechikishgan. Natijada, piyodalarni o‘tishiga imkon bergan haydovchiga 3 750 000 so‘m jarima qo‘yildi.
Ijtimoiy tarmoqlarda ushbu qaror keng tanqidga uchradi. O‘zbekistonliklar mazkur jarima protokolini qayta ko‘rib chiqishni va voqea yuzasidan barcha holatlarni aniqlashni so‘ramoqda.
Foydalanuvchilarning fikricha, agar haydovchi videoda ko‘rsatilganidek qonunbuzarlik uchun jazolangan bo‘lsa, unda protokolni rasmiylashtirgan yo‘l harakati xizmati xodimi ham javobgarlikka tortilishi lozim. Chunki haydovchi o‘z vazifasini to‘g‘ri bajargan, piyodalarni o‘tishga yo‘l bergan.
Bu holat yo‘l harakati qoidalarini amalda to‘g‘ri qo‘llash va adolatli qaror qabul qilish zaruratini ko‘rsatadi.
