Toshkent shahar Yo‘l harakati xavfsizligi boshqarmasi ijaraga berilayotgan avtomobillardan foydalanishni nazorat qilishni kuchaytirishga qaratilgan chora-tadbirlarni amalga oshirmoqda. Bu haqida Upl.uz xabar berdi.
Xususan, karsharing xizmatlariga 18 yoshga to‘lmagan, jumladan maktab o‘quvchilariga transport vositalarini boshqarishga yo‘l qo‘yilmasligi bo‘yicha rasmiy ko‘rsatma berildi. 19 may kuni poytaxt Ichki ishlar bosh boshqarmasi rahbariyati va avtomobil ijarasi bilan shug‘ullanuvchi kompaniyalar hamda to‘y marosimlariga xizmat ko‘rsatuvchi avtoparklar vakillari o‘rtasida ishchi uchrashuv bo‘lib o‘tdi.
Uchrashuvda yo‘l-transport hodisalarini kamaytirishga qaratilgan chora-tadbirlar muhokama qilindi. Asosiy e’tibor 24 may kuni o‘tkaziladigan «So‘nggi qo‘ng‘iroq» tadbiri oldidan 18 yoshga to‘lmaganlarga, xususan maktab o‘quvchilariga avtomobil berilmasligining muhimligiga qaratildi.
Uchrashuvda karsharing kompaniyalari va avtoparklar vakillari o‘zlarini cheklovlar haqida to‘liq xabardor ekanliklarini yozma ravishda tasdiqladi. Ular yo‘l harakati qoidalariga qat’iy rioya qilishga va avtomobillarni qonuniy huquqqa ega bo‘lmagan shaxslarga bermaslikka va’da berishdi.
Bu chora-tadbirlar poytaxt yo‘l harakati xavfsizligini ta’minlashga xizmat qiladi.
