O‘zbekiston Respublikasi Prezidenti Shavkat Mirziyov raisligida yo‘l harakati xavfsizligini oshirish, yo‘l infratuzilmasini yaxshilash hamda yo‘llardagi tirbandliklarni kamaytirish bo‘yicha videoselektorga yig‘ilish o‘tkazildi. Bu haqida Upl.uz xabar berdi.
Yig‘ilishda haydovchilar tomonidan ba’zi yo‘l harakati xavfsizligi boshqarmalarining jarimalar bo‘yicha qarorlarni huquqbuzarlik sodir etilganidan 7-8 oy o‘tib chiqarishlari yuzasidan norozilik bildirildi. Shu sababli jarimalarni qo‘llash tartibini tubdan o‘zgartiruvchi muhim qaror qabul qilindi.
Endilikda, agar yo‘l harakati qoidalarining buzilishi bo‘yicha bir oy ichida qaror chiqarilmasa, haydovchi jarimadan ozod qilinadi. Prezident shuningdek, zamonaviy yo‘l infratuzilmasi rivojlanishi va texnik jihatdan jihozlangan avtomobillar sonining ko‘payishi sharoitida hozirgi tezlik cheklovlarini qayta ko‘rib chiqish zarurligini ta’kidladi.
Ichki ishlar vazirligiga viloyat hokimliklari bilan hamkorlikda tezlik cheklovlarini qayta ko‘rib chiqish mumkin bo‘lgan yo‘l qismlarining ro‘yxatini tuzish topshirildi. Ushbu chora-tadbirlar yo‘l harakati xavfsizligini oshirish va tirbandliklarni kamaytirishga qaratilgan.
