Iqtisodiy tadqiqotlar va islohotlar markazining so‘nggi hisobotiga ko‘ra, O‘zbekiston avtomobil bozori sezilarli darajada o‘zgarish jarayonidan o‘tmoqda. Bu haqida Upl.uz xabar berdi.
2025 yilning birinchi olti oyida yengil avtomobillar sotilishi o'tgan yilga nisbatan 23 foizga kamayib, taxminan 446 ming dona bo‘ldi. Bozorning umumiy salbiy tendensiyasiga asosiy ta’sir ko‘rsatgan omil – ikkilamchi bozordagi savdo faolligining pasayishi bo‘ldi.
Bu bozor mamlakatdagi avtomobil savdolarining asosiy qismini tashkil etadi. Mutaxassislar avtomobil bozori jadal o‘sish davridan so‘ng barqarorlashuv bosqichiga kirganini ta’kidlamoqda.
Shunga qaramay, iyun oyidagi ma’lumotlar xaridorlar talabining tiklana boshlashidan dalolat beradi. Yozning birinchi oyida avtomobil bozori biroz jonlanganini ko‘rsatdi – iyun oyida taxminan 80 ming yengil avtomobil sotildi, bu may oyiga nisbatan 3 foizga ko‘proqdir.
Ayniqsa, yangi avtomobillar segmentida sotuvlar 10 foizga oshdi, bu may oyiga nisbatan qo‘shimcha 2,6 ming dona avtomobil demakdir. Ushbu o‘sishda mahalliy ishlab chiqarilgan avtomobillar yetakchi rol o‘ynadi.
O‘zbekistonda yig‘ilgan avtomobillar sotuvlari 23,7 ming donani tashkil qilib, oylik o‘sish 15,6 foizga yetdi. Bu iste’molchilarning mahalliy mahsulotlarga bo‘lgan qiziqishining oshishidan dalolat beradi.
Boshqa tomondan, yangi import avtomobillari segmentida kamayish kuzatildi. Iyunda xorijda ishlab chiqarilgan avtomobillar sotilishi 12,6 foizga kamayib, taxminan 4 ming donaga tushdi.
Ikkilamchi bozor esa, yarim yillik pasayishga qaramay, iyun oyida barqarorlikni saqlab qoldi. 52 mingdan ortiq avtomobil sotilishi bilan u may oyidagi ko‘rsatkichlarga yaqinlashdi va faqat 0,4 foizlik kichik pasayish qayd etdi.
Yillik taqqoslashda esa iyun 2025 yil ko‘rsatkichlari iyun 2024 yilga nisbatan 1,3 foizga o‘sdi, bu bozorning mustahkamligini ko‘rsatadi. Elektr avtomobillar bozori esa o‘zining ijobiy natijalari bilan ajralib turadi.
Iyunda 5,1 ming dona elektr avtomobili sotildi, bu may oyiga nisbatan 1,7 foizga kamroq bo‘lsa-da, olti oy davomida jami 28,8 ming dona sotilish 2024 yilning mos davriga nisbatan 62,6 foizga ko‘pdir. Elektr avtomobillarga talab eng faollashgan hududlar Sirdaryo, Xorazm va Qashqadaryo viloyatlari hisoblanadi.
Shuningdek, O‘zbekiston avtomobil sanoatida muhim sana sifatida 1996 yil 19 iyulni ko‘rsatish mumkin. Shu kuni Asaka shahridagi zavodda Uz-Daewoo brendi ostida birinchi avtomobil – Nexia modeli ishlab chiqarilgan edi.
Bu voqea mamlakat avtomobil sanoatining rivojlanishida muhim bosqich bo‘ldi.
