NATO razvedkasi: Rossiya armiyasi Ukraina urushida qancha harbiylarini yo‘qotdi?
Ukrainaga qarshi urushda Rossiyaning 250 ming harbiy xizmatchisi halok bo‘lgan, deb Deutsche Welle NATOning noma’lum yuqori martabali amaldoriga tayanib xabar berdi. Urush boshlanganidan beri Rossiya armiyasi tomonidan ko‘rilgan umumiy yo‘qotishlar soni 900 ming nafardan oshgan.
Amaldorning so‘zlariga ko‘ra, Rossiya har kuni o‘rtacha 1000 nafardan ortiq harbiy xizmatchini yo‘qotmoqda (halok bo‘lganlar va yaralanganlar qo‘shib hisoblanganda). Yaralanganlarning aksariyati sifatsiz tibbiy xizmat sabab nogironlikka uchragan.
Ushbu ma’lumotlar NATO tashqi ishlar vazirlarining Bryusseldagi uchrashuvi doirasida e’lon qilingan. Shu bilan birga, NATO vakili Rossiya armiyasi yo‘qotishlarni qisqa muddatda to‘ldirishga muvaffaq bo‘layotganini, biroq Ukrainadagi harakat sur’ati pasayganini ta’kidlagan.
NATOning aytishicha, Rossiya hukumati katta yo‘qotishlar evaziga sekin ilgarilashga tayyorligini namoyon qilmoqda. Rossiya jamiyati esa hozircha bu darajadagi qurbonlar sonidan ommaviy norozilik bildirishga tayyor emas.
Internetdagi nekrologlar va ochiq manbalar orqali shaxsan aniqlangan halok bo‘lgan rossiyalik harbiylar soni 100 mingdan oshgan. Ulardan 4842 nafari ofitserlardir. Eng ko‘p yo‘qotish Bashkortistonda qayd etilgan — 4487 kishi. Undan keyin Tatariston (4371) va Sverdlovsk viloyati (3446) joylashgan.
