Xitoy bojlari AQSh fond bozorini larzaga soldi
Xitoy AQSh tovarlariga 34 foizlik boj joriy etishini e’lon qilganidan so‘ng, AQSh fond indekslari pasayishda davom etdi, deb The Economist xabar berdi.
Dow Jones indeksi 2,2 foizga tushdi, S&P 500 — 2,5 foizga, NASDAQ esa 2,6 foizga qulab tushdi. Tesla va Apple aksiyalari har biri 6 foizga arzonlashdi. Alphabet, Microsoft, Nvidia va boshqa yirik texnologiya kompaniyalari aksiyalari ham tushishda davom etmoqda.
Aktivlari bo‘yicha AQShning eng yirik banki JPMorgan Chase aksiyalari 7,3 foizga kamaydi. Goldman Sachs va Morgan Stanley aksiyalari ham shunga yaqin darajada pasaydi.
Yirik neft kompaniyalari ham orqada qolmadi: Exxon aksiyalari 4,8 foizga, Chevron esa 4 foizga tushdi. Mamlakatdagi eng yirik neftni qayta ishlash zavodi Marathon Petroleum aksiyalari 4,6 foizga arzonlashdi.
Xitoyning bojlarga bo‘lgan munosabati investorlar orasida mamlakatlar muzokara o‘tkazishdan ko‘ra, o‘zaro qat’iy choralar ko‘rishi mumkin degan xavotirlarni kuchaytirdi. Bu esa keng ko‘lamli savdo urushi ehtimolini oshirdi.
Bir kun avval, Donald Tramp boshqa mamlakatlardan olib kiriladigan tovarlarga yangi bojlar joriy qilish haqidagi xabardan so‘ng dunyo bo‘ylab kompaniyalar umumiy bozor qiymati 3,1 trillion dollarga kamaydi. Shuningdek, asosiy fond indekslari 5-6 foizga yo‘qotish kuzatdi.
