Zelenskiy Putinning to‘g‘ridan to‘g‘ri muzokaralar o‘tkazish taklifiga qanday javob qaytardi?
Ukraina prezidenti Vladimir Zelenskiy mamlakatning Rossiya bilan to‘liq va uzoq muddatli tinchlikka erishishi uchun muhim qadam qo‘yishga tayyorligini e’lon qildi. U o‘zining Telegram-kanalida Rossiya tomoni 12 maydan boshlab to‘liq, ishonchli va uzoq muddatli otashkesimga rozilik berishidan umid qilmoqda ekanligini yozib qoldirdi.
«Rossiyaliklar va nihoyat urushni to‘xtatish haqida o‘ylay boshlashgani yaxshi alomat. Jahon hamjamiyati buni uzoq vaqtdan beri intiqlik bilan kutyapti. Urushni haqiqatda yakunlash yo‘lidagi ilk muhim qadam — bu o‘t ochishni to‘liq to‘xtatishdir», — dedi Zelenskiy o‘z bayonotida.
Ukraina prezidenti ofisi rahbari Andrey Yermak ham otashkesimni dastlabki 30 kun davomida amalga oshirishga tayyor ekanliklarini tasdiqladi va bu jarayon tinchlik muzokaralari bilan davom etishini ta’kidladi: «Avvaliga 30 kunlik sulh, keyin esa tinchlik uchun barcha masalalar muhokama qilinadi», — dedi Yermak.
Shuni qayd etish kerakki, Zelenskiy ham, Yermak ham Rossiya prezidenti Vladimir Putin tomonidan taklif qilingan to‘g‘ridan to‘g‘ri muzokaralar borasida o‘z bayonotlarida alohida to‘xtalmagan.
Avvalroq, 10 may kuni Kiyev shahrida Fransiya prezidenti Emmanuel Makron va Yevropa Ittifoqi davlatlari rahbarlari bilan uchrashuv bo‘lib o‘tgan edi. Ushbu uchrashuv natijasi o‘laroq, Kiyev rasmiylari 12 maydan boshlab quruqlik, havo va dengizdagi barcha harbiy harakatlarni kamida 30 kun muddatga to‘liq va shartsiz to‘xtatishga tayyor ekanini rasman ma’lum qilgan edi. AQSH prezidenti Donald Tramp ham ushbu tashabbusni qo‘llab-quvvatlagan.
Biroq Rossiya tomonidan hozircha aniq javob berilmagan. Rossiya prezidentining matbuot kotibi Dmitriy Peskov Moskva 30 kunlik o‘t ochishni to‘xtatish bo‘yicha taklif ustida o‘ylayotganini ma’lum qilgan va shu bilan birga, Rossiyaga xalqaro bosim o‘tkazish harakatlari samarasiz ekanini ta’kidlagan edi.
Shundan so‘ng, 11 may kuni kechasi Vladimir Putin maxsus matbuot anjumani o‘tkazib, Kiyevga 15 may kuni Istanbul shahrida to‘g‘ridan to‘g‘ri muzokaralarni qayta tiklashni taklif qildi. Biroq Putin o‘zining ushbu chiqishida Ukraina va Yevropa davlatlari tomonidan ilgari surilgan 30 kunlik otashkesim haqidagi tashabbusga aniq munosabat bildirmadi.
Tahlilchilarning fikriga ko‘ra, ushbu muzokaralar amalga oshsa, bu ikki mamlakat o‘rtasidagi uzoq muddatli harbiy mojaroni tinch yo‘l bilan hal qilish uchun muhim qadam bo‘lishi mumkin. Xalqaro hamjamiyat esa Moskva va Kiyevdan tinchlik yo‘lidagi yangi tashabbuslarni kutib qolmoqda.
Zamin.uz tahririyati vaziyatning rivojini kuzatib, tinchlik jarayoni haqidagi xabarlarni o‘z o‘quvchilariga muntazam yetkazib turadi.
