Amerika Qo‘shma Shtatlari hamda Xitoy o‘rtasida davom etib kelayotgan savdo mojarosida muhim burilish kuzatildi. Bloomberg agentligining xabar berishicha, ikki mamlakat rahbariyati o‘zaro bojxona tariflarini 90 kun muddatga pasaytirish bo‘yicha kelishuvga erishdi.
Jeneva shahrida ikki mamlakat vakillari o‘zaro hamkorlik bo‘yicha qo‘shma bayonotni e’lon qildi. Unda ta’kidlanishicha, AQSH va Xitoy o‘zaro munosabatlardagi keskinlikni yumshatib, iqtisodiy masalalardagi qarama-qarshiliklarni hal qilish uchun qo‘shimcha vaqt berishni maqsad qilgan.
Kelishuv shartlariga ko‘ra, Amerika tomonidan Xitoyning import mahsulotlariga qo‘yilgan 145 foizlik bojxona tariflari, jumladan, fentanil kabi mahsulotlarga ham, 30 foizgacha tushiriladi. Shuningdek, Pekin tomoni ham javob tariqasida AQSH tovarlari uchun joriy qilingan 125 foizlik tariflarni 10 foizgacha pasaytirish majburiyatini oldi.
Ikki mamlakat o‘zaro savdo-iqtisodiy aloqalarni muhokama qilish uchun maxsus mexanizm yaratish haqida kelishib oldi. Ushbu muzokaralar jarayoniga Xitoy bosh vazirining o‘rinbosari He Lifen, AQSH moliya vaziri Skott Bessent va AQSH savdo vakili Jeymison Grir rahbarlik qiladigan bo‘ldi.
Muzokaralar navbatma-navbat AQSH, Xitoy yoki ikki davlat kelishgan uchinchi bir davlat hududida tashkil etiladi. Zaruriyat paydo bo‘lgan taqdirda, tomonlar iqtisodiy masalalar bo‘yicha qo‘shimcha maslahatlashuvlarni ishchi guruhlar darajasida o‘tkazadi.
Trampning savdo mojarosi tarixi
Eslatib o‘tamiz, 2 aprel kuni AQSH prezidenti Donald Tramp barcha davlatlar uchun 10 foizlik asosiy bojxona tarifini belgilagan edi. Ammo bu tariflar har bir mamlakatning AQSH bilan savdo balansidan kelib chiqib o‘zgargan. Xitoy bilan savdodagi katta defitsit sababli Amerika bu mamlakatga qo‘yiladigan tariflarni 34 foizga oshirib yuborgan.
Pekin ham bunga javob tariqasida Amerika tovarlari uchun shuncha miqdorda tariflarni joriy qildi. Shundan keyin AQSH rahbari Xitoy o‘zining javob choralaridan voz kechmasa, bojlarni 50 foizgacha ko‘tarish bilan tahdid qildi. Natijada tariflar 104 foizgacha ko‘tarildi, bunga javoban Xitoy ham Amerika tovarlari uchun tariflarni 84 foizgacha oshirdi.
Tramp bunga nisbatan yanada qat’iyroq chora ko‘rib, Xitoy tovarlari uchun tariflarni 125 foizgacha oshirdi va keyinchalik bu ko‘rsatkichni 145 foizga yetkazdi. Xitoy ham o‘z navbatida bojxona tariflarini 125 foizgacha ko‘tardi va AQSHni «o‘zaro tariflar»dan voz kechishga chaqirdi. Xitoy rahbari Si Szinpin esa «boj urushidan hech bir davlat g‘olib chiqmasligini» qayd etgan edi.
Uzoq davom etgan savdo mojarosidan keyin ikki mamlakat nihoyat muzokaralar stoliga o‘tirishga qaror qildi va bu borada muhim kelishuvlarga erishildi.
Zamin.uz tahririyati AQSH va Xitoy o‘rtasidagi iqtisodiy munosabatlarni diqqat bilan kuzatib, o‘z o‘quvchilariga yangiliklarni muntazam ravishda yetkazib turadi. Biz bilan birga qoling!
