Turkiyaning janubiy sohilidagi Mug‘la viloyatida 5,8 magnitudali kuchli yer silkinishi qayd etildi. Ofat oqibatida Marmaris shahri aholisi orasida kuchli vahima va sarosima yuzaga keldi. Eng achinarlisi, bu vaziyatda 14 yoshli Afranu Gunl fojiali tarzda hayotdan ko‘z yumdi.
Turkiya ichki ishlar vazirligining bergan ma’lumotlariga ko‘ra, zilzila Egey dengizining Marmaris yaqinida, dengiz sathidan 67 km chuqurlikda yuz bergan. Yer silkinishi mahalliy vaqt bilan tonggi soat 02:17 da sodir bo‘lgan. Yevropaning seysmologik markazi yerosti tebranishini o‘rtacha deb baholagan bo‘lsa-da, mahalliy aholi orasida kuchli qo‘rquv va xavotirni keltirib chiqardi.
Zilzila paytida ko‘plab odamlar binolarning qulashi mumkinligidan xavotirlanib, baland qavatlardan pastga sakrashga majbur bo‘lgan. Hozircha ma’lum bo‘lishicha, 69 kishi turli darajada tan jarohatlari olgan. Ulardan 46 nafari tez tibbiy yordam mashinalarida kasalxonalarga yotqizilgan, 14 nafar odamga esa shifokorlar tomonidan joyida birinchi tibbiy yordam ko‘rsatilgan. Shu bilan birga, jarohati yengil bo‘lgan 8 kishi shifoxonadan uyiga chiqarilgan.
Ayniqsa, 14 yoshli qiz Afranu Gunlning fojiali o‘limi keng jamoatchilik e’tiborini jalb qildi. Ma’lum qilinishicha, qizchaning o‘limiga sabab shifokorlar tomonidan "vahima hujumi" deb qayd etilgan holat bo‘lgan. Afranu kasalxonaga olib kelinganida uni saqlab qolish uchun ko‘rilgan barcha tibbiy choralar afsuski, samarasiz bo‘lib chiqqan.
Zilzila oqibatida shahardagi infratuzilma, elektr ta’minoti va tabiiy gaz tizimlariga jiddiy zarar yetmagani xabar qilingan bo‘lsa-da, voqea joyidan tarqatilgan videolavhalar aholining qo‘rquv va sarosimaga tushganini ochiq ko‘rsatmoqda.
Ayniqsa, mahalliy restoranlardan biriga tashrif buyuruvchilarni qamrab olgan ushbu kutilmagan holat videokameralarga ham tushib qolgan. Ijtimoiy tarmoqlarda tarqalgan ushbu videolarda odamlarning zilziladan qochib, restorandan vahima bilan chiqib ketayotganlari aks etgan.
Eslatib o‘tish joizki, Turkiya seysmologlari so‘nggi paytlarda mamlakat hududida zilzila xavfi yuqori bo‘lgan hududlarning mavjudligi va kuchli zilzila ehtimoli haqida muntazam ogohlantirib kelishmoqda. Xususan, 2023 yilning fevral oyida sodir bo‘lgan katta fojia natijasida 50 mingdan ziyod odam halok bo‘lgan edi.
Shuningdek, olimlar Istanbul atrofida kelgusi yillarda yana bir katta zilzila bo‘lishi ehtimoli yuqori ekanini prognoz qilmoqda. Ular 2030 yilga qadar mamlakat hududida kuchli zilzila sodir bo‘lishi mumkinligidan ogohlantirib, hukumat va aholini ehtiyotkorlik va favqulodda vaziyatlarga tayyor turishga chaqiradi. Buning uchun fuqarolarning favqulodda vaziyatlarda harakat qilish madaniyatini shakllantirish muhim ahamiyat kasb etadi.
Hozirda esa, mamlakat rahbariyati tomonidan zilziladan zarar ko‘rganlarga tibbiy va psixologik yordam ko‘rsatish ishlari faol davom ettirilmoqda.
